ՏԵՍԱՆՅՈՒԹ․ Շիրակի մարզում նկատել են ռուսական տանկերի տեղաշարժ
Ֆեյսբուքյան օգտատեր Արմեն Հայրապետյանը իր էջում տեսանյութ է հրապարակել, թե ինչպես են Գյումրիում տեղակայված 102-րդ ռազմաբազայի տանկերը և այլ զինտեխնիկա շարասյունով ընթանում: Հրապարակած կադրերից պարզ է դառնում, որ ռուսական տանկերն ընթանում են Շիրակի մարզի Կապս համայնքի մոտակայքով: Օգտատերերի շրջանում անհանգստություն է առաջացել, թե ինչ նպատակով է այդ զինտեխնիկան գտնվում այդ տարածքում:
Շիրակի մարզպետարանի տեղական ինքնակառավարման և հանրապետական գործադիր մարմինների հարցերով վարչության պետ Արամ Անտոնյանը Factor am-ի հարցին ի պատասխան նշել է, որ այդ տարածքը նախատեսված է ռուսական ռազմաբազայի զորավարժությունների համար:
«Դա իրենց տարածքն է, իրենք այդտեղ միշտ զորավարժություններ են անում: Իրենց կողմից տեղաշարժ եղել է, բայց ահազանգ չի եղել, որ մի բան այն չեն անում: Այդ տարածքը գտնվում է Կապս, Վահրամաբերդ և Հովունի համայնքների հարևանությամբ, որը կոչվում է «Կամխուդ»»,- ասել է Արամ Անտոնյանը:
