Վնասված վագոնն այժմ վերանորոգվում է. մեղավորները կպատժվեն
Այսօր առավոտյան հայտնել էինք, որ անհայտ անձը քարով հարվածել է Երևանի մետրոպոլիտենի գնացքին, որի հետևանքով կոտրվել է վագոնի պատուհանը: Այս մասին Facebook-ի իր էջի միջոցով պատկան մարմիններին տեղեկացրել է քաղաքացի Նազելի Նիկողոսյանը: Ըստ նրա՝ հունվարի 26-ին, ժամը 18։00-ից 18։10-ն ընկած ժամանակահատվածում, մետրոյի Սասունցի Դավիթ կայարանից Զորավար Անդրանիկ տանող ճանապարհի հատվածում, ընթացքի ժամանակ անհայտ անձը գնացքի պատուհանին հարվածել է մեծ քարով, որը միայն երջանիկ պատահականությամբ չի դիպել նրա երեխային կամ որևէ այլ ուղևորի: Հարվածի հետևանքով կոտրված ապակու կտորները, քարի հետ միասին, լցվել են վագոնի մեջ։ «Գործն այժմ Ոստիկանության տիրույթում է: Բարեբախտաբար տուժածներ չկան»,-Ավրորա Մեդիայի հետ զրույցում հայտնեց «Երևանի մետրոպոլիտեն» ՓԲԸ-ի մամուլի խոսնակ Տաթևիկ Խաչատրյանը: Նրա խոսքով, վագոնում ուղեւորները խուճապի են մատնվել, ինչն էլ բնական է: Վնասված վագոնն այժմ վերանորոգվում է ասաց Երևանի մետրոպոլիտենի մամուլի խոսնակը, հույս հայտնելով, որ Մետրոպոլիտենի ու Ոստիկանության համագործակցության արդյունքում մեղավորները կպատժվեն: Տաթևիկ Խաչատրյանը նաև նշեց, որ միջադեպի մանրամասներն արդեն վաղը կներկայացվի:
