Նախկին գլխավոր դատախազ Գեւորգ Կոստանյանը մեկ-երկու ամիս է՝ Ստրասբուրգ-Երեւան ճանապարհներին է: Ասում են՝ նա Հայաստանում եւ Սփյուռքում ապրող մեր Ցեղասպանության զոհերի իրավահաջորդների անունից հայցեր ներկայացնելու գործին է լծվել։ Այս մասին տեղեկացնում է armdaily. am-ը։ Լրատվականի փոխանցմամբ՝ գործի ստանձնումը սեփական նախաձեռնությամբ է, թե հայրենիքին անշահախնդիր օգնելու գործունեության շրջանակներում՝ դեռևս հայտնի չէ։ Այս պահին ակտիվ աշխատանքներ են կատարվում հայցերի ներկայացման համար։ Սա, հնարավոր է, պատասխանն է Ադրբեջանի կողմից ընդդեմ Հայաստանի 50 մլրդ դոլարի միջպետական հայց ներկայացնելուն։ Ստրասբուրգ այցերի, ներկայացվելիք հայցերի մասով լրատվամիջոցը փորձել է Գեւորգ Կոստանյանից մեկնաբանություն ստանալ, նա միայն հաստատեց, որ նման մտադրություն կա, սակայն խոստացավ թեմային անդրադառնալ ավելի ուշ։ Հարցին, թե ինչո՞ւ նախկինում Կոստանյանը չէր զբաղվում այս հայցերի ներկայացմամբ, նախկին դատախազը պարզաբանել է, որ միշտ պետական պաշտոն է զբաղեցրել, իսկ պետությունը չի կարող որեւէ մասնակցություն ունենալ ներկայացվող հայցերում եւ հետո ժամանակ չուներ։ Կոստանյանը պարզաբանել է նաև, որ միջազգային փաստաբանների հետ այժմ բանակցում են, սակայն հրաժարվեց կոնկրետ անուններ նշել։