Գինեգործությունը նոր որակ է ստանում. Արցախում կայացել է գինու փառատոնը
Արցախում կազմակերպվող յուրաքանչյուր գինու փառատոնի մասնակիցների թիվը տարեցտարի ավելանում է, ինչպես նաև նկատելի է դառնում միջոցառման կազմակերպվածության բարձր մակարդակը: «Արցախպրես»-ի հաղորդմամբ` այս մասին ասել է ԱՀ պետական նախարար Գրիգորի Մարտիրոսյանը:
Շրջելով տաղավարներով և զրուցելով գինեգործների հետ, Գ. Մարտիրոսյանը եկել է այն եզրահանգման, որ Արցախում գինեգործությունը նոր որակ է ձեռք բերում:
«Որակի բարձրացման առումով մենք ունենք զգալի առաջընթաց: ԱՀ-ում կան բոլոր նախադրյալները, որպեսզի գինեգործներն իրենց արտադրանքը կարողանան արտահանել արտերկիր: Փառատոնին ներկայացված են բավականին հետաքրքիր ու որակյալ գինիների տեսկանի»,-ավելացրել է պետնախարարը:
Փառատոնին ներկա ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանն էլ նշել է, որ փառատոնը ոչ միայն գինեգործական ընկերությունների ներկայացվածության, այլև ոչ նյութական ժառանգության գինու մշակույթի տարածման նպատակներ ունի: Ըստ նրա՝ շատ ուրախալի է, որ հայ ժողովրդի ավանդական խմիչքներից՝ գինու ներկայացումը մեծ պահանջարկ է վայելում հանրության լայն շրջանում:
