Ամեն չհասկացած բան սատանայապաշտություն անվանելը ճիշտ չի․ պատգամավոր
«Իմ քայլը» խմբակցության պատգամավոր Վահագն Թևոսյանն, անդրադառնալով մետրոյի Հանրապետության կայարանի մոտ երեկ ցուցադրված «Հուզանք ու զանգ» աղմկահարույց ներկայացմանը, իր ֆեյսբուքյան էջում գրել է․
«Բազմաթիվ բաներ կան, որոնք չեմ հասկանում: Օրինակ հենց վերջին պերֆորմանսը, չեմ հասկացել ոչ միայն թե ինչ էր դա, այլ նաև՝ թե ինչու: Բայց շատ բնական եմ համարում, որ դա հասկացել են շատ այլ մարդիկ, բազմազանությունը նաև դա է:
Ուզում եմ ասել, որ ամեն չհասկացած բան սատանայապաշտություն անվանելը, մեղմ ասած, ճիշտ չի, խավարամտության հոտ է գալիս: Եղել են նման ժամանակներ, ու հույս կար՝ վաղուց են անցել: Իսկ համարել, որ հասկացել ես ու հասկացել ես որպես սատանայապաշտություն, դա արդեն օբյեկտիվ խավարամտությունից բխող սուբյեկտիվ գոռոզամտություն է, կարծիքովս:
Առավել ևս, որ սատանայապաշտության թեման ինքնին արհեստական է, առավել ևս Հայաստանում: Համարյա նույնքան ակտուալ է, որքան Հայաստանի ֆորմալ իսլամացումը: Թե ինչու՝ այլ խոսակցություն է, բայց դե՝ էդպես է:
Պատկերացրեք՝ վերջին հարյուրամյակում ձևավորված փսևդոհայկական ենթամշակույթներին անծանոթ մեկը դիտի Գևորգ Պետրոսյանի երաժշտական պերֆորմանսը դաշնամուրի հետ, գուցե թվա՝ նամազ է կամ բայաթի, ու կարծի՝ Պետրոսյանն իր մշակույթով իսլամ է քարոզում: Բաց մենք հո գիտե՞նք, որ այդպես չէ: Դա ուղղակի արվեստի տեսքով ինքնարտահայտման ձև է, որին անծանոթ մարդը կարող է սխալ հետևություններ անել:
Եթե մի բանից չեմ հասկանում, կարդում եմ: Նույնիսկ պատահում է՝ չհասկանալս չխոստովանելով թաքուն եմ կարդում (այնքան պրիմիտիվ բան է լինում չհասկացածս, որ ամաչում եմ): Այսօր երեկոյան կարդալու եմ ամեն ինչ հասկացող մարդկանց մասին, որ փորձեմ նրանց հասկանալ»:
