Զոդի կամրջի վրա ողբերգական ավտովթարի առթիվ հարուցված քրգործի նախաքննությունն ավարտվել է․ ՔԿ

ՀՀ քննչական կոմիտեի Արարատի մարզային քննչական վարչության Վեդիի քննչական բաժնում ավարտվել է 7 մարդու մահվան պատճառ դարձած ավտոպատահարի առթիվ հարուցված քրեական գործի նախաքննությունը:

Դեպքը տեղի է ունեցել 2019 թվականի հուլիսի 6-ին՝ ժամը 15-ի սահմաններում. Երևան-Մեղրի ավտոճանապարհին՝ Արարատ քաղաքի ՈԿՖ բանավանի կամրջի ավտոճանապարհահատվածում, բախվել էին «Տոյոտա Հիլուքս», «ԳԱԶԵԼ» և «Վազ-21063» մակնիշի ավտոմեքենաները. արդյունքում ՝ յոթ  մարդ մահացել էր, ևս չորս մարդու առողջությանը պատճառվել էր միջին ծանրության և ծանր մարմնական վնաս:

Մինչդատական վարույթում իրականացված քննչական գործողությունների արդյունքում պարզվել են ավտոպատահարի մի շարք հանգամանքներ:

Նախաքննությամբ փաստական տվյալներ են ձեռք բերվել այն մասին, որ Երևան քաղաքի՝ 1956թ. ծնված բնակիչը, վարելով «Տոյոտա Հիլուքս» մակնիշի ավտոմեքենան, խախտել է  ճանապարհային երթևեկության անվտանգության ապահովմանն ուղղված պահանջները և ճանապարհային երթևեկության կանոնները:

 

Այսպես՝ «Տոյոտա Հիլուքս» մակնիշի ավտոմեքենայի վարորդը, ընթանալով Երևան-Մեղրի ավտոճանապարհով դեպի Երևան քաղաք, Արարատի մարզի Արարատ քաղաքի ՈԿՖ բանավանի կամրջի ավտոճանապարհահատվածում իրականացնելով իր վարած ավտոմեքենայի ընթացքի ոչ պատշաճ և վտանգավոր կառավարում, այն է` ավտոմեքենան դուրս բերելով հանդիպակաց ուղղության երթևեկելի ուղեմաս և իրականացնելով ձախակողմյան երթևեկություն, իր վարած ավտոմեքենայով բախվել է այդ ուղեմասով դեպի Երասխ ընթացող «ԳԱԶԵԼ» մակնիշի երթուղային ավտոմեքենային՝ տեխնիկական տեսակետից ստեղծելով վթարային իրադրություն՝ ինքն իրեն զրկելով այն կանխելու տեխնիկական հնարավորությունից:

Այնուհետև, «ԳԱԶԵԼ» մակնիշի երթուղային ավտոմեքենայի հետնամասին առաջամասով բախվել է «Վազ-21063» մակնիշի ավտոմեքենան և նույն պահին «Տոյոտա Հիլուքս» մակնիշի ավտոմեքենայի բախման հետևանքով «ԳԱԶԵԼ» մակնիշի երթուղային ավտոմեքենայի շարժիչի տեղամասում գազի համակարգից առաջացած գազի արտահոսքից հրդեհ է բռնկվել երթուղային ավտոմեքենայում, որը տարածվել է «Տոյոտա Հիլուքս» և «Վազ-21063» մակնիշի ավտոմեքենաներում՝ անզգուշությամբ առաջացնելով «ԳԱԶԵԼ»-ի վարորդի և 6 ուղևորների մահ, իսկ ևս 4 ուղևորների առողջությանը պատճառվել է միջին ծանրության ծանր մարմնական վնաս:

 

Դատաավտոտեխնիկական և դատահրդեհատեխնիկական համալիր փորձաքննության եզրակացությամբ՝ «Տոյոտա Հիլուքս»-ի վարորդը թույլ է տվել ՃԵԿ-ի 2-րդ կետի ու «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջներին հակասող գործողություն, դրանով իսկ պայմանավորել պատահարի առաջացումը՝ ինքն իրեն զրկելով այն կանխելու տեխնիկական հնարավորությունից:

Առաջադրված պայմաններում «Տոյոտա Հիլուքս» մակնիշի ավտոմեքենայի վարորդը, երթևեկության անվտանգությունն ապահովելու, վթարային իրադրություն չստեղծելու և տվյալ պատահարի առաջացումը բացառելու նպատակով, տեխնիկական տեսակետից պետք է իրականացներ իր վարած ավտոմոբիլի ընթացքի պատշաճ և անվտանգ կառավարում` ձեռնպահ մնալով իր վարած տրանսպորտային միջոցը հանդիպակաց ուղղության երթևեկելի ուղեմաս դուրս բերելուց և ձախակողմյան երթևեկություն իրականացնելուց:

Ըստ փորձագետի եզրակացության՝ հրդեհի առաջացման հավանական պատճառ է հանդիսացել «ԳԱԶԵԼ» մակնիշի ավտոմոբիլի շարժիչի տեղամասում գազի համակարգից արտահոսած գազի բռնկումը՝ մախանիկական կամ էլեկտրական կայծի առաջացման պարագայում:

Ավտոմեքենայի տեխնիկական վիճակով պայմանավորված հրդեհի ինքնաբռնկում հնարավոր չէ, հրդեհի բռնկման համար անհրաժեշտ են մի շարք պայմաններ (վթար, մեխանիկական կամ էլեկտրական կայծ և այլն):

 

Փորձագետի եզրակացության համաձայն՝ նախ «Տոյոտա Հիլուքս» մակնիշի ավտոմեքենան առջևի ձախ մասով ընդհարվել է «ԳԱԶԵԼ» մակնիշի ավտոմոբիլի առջևի ձախ մասի հետ, որից հետո միայն «ՎԱԶ-21063» մակնիշի ավտոմոբիլն առջևի աջ անկյունային մասով ընդհարվել է «ԳԱԶԵԼ» մակնիշի ավտոմոբիլի հետևի ձախ մասին: Միաժամանակ, փորձագետների եզրակացությամբ՝ հրդեհի օջախը գտնվել է «ԳԱԶԵԼ» մակնիշի ավտոմոբիլի շարժիչի տեղամասում: Օջախում առաջացած բաց կրակը շարժիչի տեղամասի և ուղևորասրահի այրունակ նյութերի վրայով տարածվել է բոլոր ուղղություններով, ավտոմոբիլի ամբողջ մակերևույթով և անցել վթարի հետևանքով վերջինիս կիպ կայանված «Տոյոտա Հիլուքս» և «Վազ-2106» մակնիշի ավտոմեքենաները: Ինտենսիվ այրմանը և կրակի արագ տարածմանը նպաստել է «ԳԱԶԵԼ» մակնիշի համարանիշի ավտոմոբիլում տեղի ունեցած գազի արտահոսքը, իսկ հրդեհի առաջացման հավանական պատճառ է հանդիսացել «ԳԱԶԵԼ» մակնիշի ավտոմոբիլի շարժիչի տեղամասում գազի համակարգից արտահոսած գազի բռնկումը՝ մախանիկական կամ էլեկտրական կայծի առաջացման պարագայում:

Ինչ վերաբերում է «ՎԱԶ-21063» մակնիշի ավտոմեքենային, ապա առջևից ընթացող «ԳԱԶԵԼ» մակնիշի ավտոմոբիլի նատմամբ տարածություն պահելու առումով «ՎԱԶ-21063»-ի վարորդի իրականացրած երթևեկությունը տեխնիկական տեսակետից թույլատրելի է եղել և չի հակասել ՃԵԿ-ի պահանջներին:  Հետևաբար նշված հանգամանքը տեխնիկական տեսակետից չէր կարող պատճառական կապի մեջ լինել «ՎԱԶ-21063»-ի և «ԳԱԶԵԼ»-ի ընդհարման առաջացման հետ:

 

Ձեռք բերված բավարար ապացույցների համակցությամբ՝ «Տոյոտա Հիլուքս»-ի վարորդին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասով: Նրա նկատմամբ որպես խափանման միջոց ընտրվել է կալանավորումը:

Հայտարարվել է նախաքննության ավարտի մասին և քրեական գործը, մեղադրական եզրակացությունը հաստատելու և դատարան ուղարկելու միջնորդությամբ, ուղարկվել է նախաքննության օրինականության նկատմամբ հսկողություն իրականացնող դատախազին:

 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:


 

Քաղաքականություն

Պատահարներ