Զինվորին ինքնասպանության դրդողն առավելագույն պատժաչափ կստանա. Զոհրաբյան

ԱԺ ԲՀԿ խմբակցության պատգամավոր Նաիրա Զոհրաբյանը ֆեյսբուքյան իր էջում գրել է. «Զինվորին ինքնասպանության դրդողն առավելագույն պատժաչափ կստանա. քիչ առաջ խորհրդարանը միաձայն կողմ քվեարկեց իմ և իմ գործընկերների կողմից ներկայացված՝ ՀՀ քրեական օրենսգրքում փոփոխությունների նախագծին, որը ծանր պատժաչափեր և ազատազրկման մեծ չափ է նախատեսում զինվորական ծառայության մասնակից բոլոր այն սուբյեկտների համար, ովքեր զինվորին, կամ սպային նվաստացնելով, վերջինիս արժանապատվությունը վիրավորելով՝ կդրդեն ինքնասպանության։


 Զարհուրելի է, երբ բանակում թշնամու գնդակից ավելի քիչ մահ ենք մենք ունենում, քան ոʹչ կանոնադրական, ոʹչ պատշաճ հարաբերությունների, «դեդավշինայի», «պարոչնի կռուգի» և բանակային ենթամշակույթի այլ դրսևորումների պատճառով։

 

Օրենքի վերջնական ընդունումից հետո հատ-հատ լինելու ենք բոլոր զորամասերում և ներկայացնելու ենք կատարված լրջագույն փոփոխությունները։
Ու սա միայն առաջին քայլն է։ Բանակային ենթամշակույթի դեմ համակարգված աշխատանք պիտի սկսել և այդտեղ մեզանից յուրաքանչյուրն իր անելիքն ունի։


Ես առաջիկայում Պաշտպանության նախարարությանը կներկայացնեմ նման երևույթները կանխելու, կամ՝ գոնե նվազեցնելու մեր տեսլականը, որը, բնականաբար, հիմնված է միջազգային հաջող փորձի վրա։
Շնորհակալ եմ խորհրդարանի բոլոր խմբակցություններին՝ այս կարևոր նախագծին աջակցելու համար»։

Քաղաքականություն