ԱԺ «Լուսավոր Հայաստան» խմբակցության ղեկավար Էդմոն Մարուքյանը լրագրողների հետ զրույցում անդրադարձավ ԱԺ  չկայացած արտահերթ նիստին ու դրա չկայանալու պատճառներին:

«Երկու օրվա մեջ երեք անգամ ԱԺ խորհրդի նիստ է հրավիրվել ու հետաձգվել: Նախագիծ է բերվել, հանվել, բերվել, լրամշակվել, հետո հրավիրվել է այս նիստը, եկել ենք, հիմա էլ այս նիստից են հանել նախագիծը: Բաներ կան՝ պետք է շտկենք, էլի բերենք:

Դուք պատկերացնո՞ւմ եք՝ ինչքա՞ն կարելի է նման կարևոր պրոցեսն անլրջացնել, մյուս կողմից՝ ինչքա՞ն կարելի է լինել անորոշ ու չիմանալ՝ ինչ ես ուզում անել: Իրավաբաններ կան, մասնագետներ կան, գրում են, բերում:

Պատկերացրեք՝ ինչքան խնդրահարույց է այդ փաթեթը, որ ինչքան շտկում են, էնքան շտկելու տեղ կա: Բայց ես տեղեկացնեմ՝ էդ փաթեթն ինչքան էլ շտկեն, չի կարող շտկվել: Դրա էությունն է հակասահմանադրական»,- ասաց նա:

Մարուքյանը նաև տեղեկացրեց՝ մեկ ժամից հրավիրվել է ԱԺ խորհրդի նիստ, որի ժամանակ կրկին հրավիրվելու է արտահերթ նիստ: