Ազգային անվտանգության ծառայությունը (ԱԱԾ) այսօր առավոտյան  հայտնել էր, որ բացահայտվել է ֆինանսական բուրգի մասնաճյուղ ստեղծելու, ղեկավարելու և դրանում առանձնապես խոշոր չափերով գումարներ ներգրավելու դեպք, ինչի առիթվ ԱԱԾ քննչական դեպարտամենտում քրեական գործ էր հարուցվել: Այս մասին գրում է «Հետք»-ը: 

Սակայն ԱԱԾ-ն իր հաղորդագրության մեջ չէր նշել, թե խոսքը որ կազմակերպության մասին է: «Հետք»-ը դատախազության հանրային կապերի բաժնից ճշտեց, որ խոսքը «Օնիքսում» ընկերության մասին է, որի ծավալած գործունեությանը լրատվամիջոցը  նախորդ տարվա դեկտեմբերին անդրադարձել էր: 

«Օնիքսում»-ի սեփականատերը կանադաբնակ իրանցի Մոհամադ-Ֆարիդ Զաեմզադեհն էր (Mohamad Farid Zaem Zadeh), որի բիզնեսը Հայաստանում ընդլայնվում է հայաստանցի, այսպես կոչված, «լիդերների» միջոցով:

Ըստ ԱԱԾ տարածած հաղորդագրության՝ Հայաստանի մի խումբ քաղաքացիներ, նպատակադրվելով ՀՀ տարածքում ընդլայնել արտերկրում գրանցված, ֆինանսական բուրգին բնորոշ հատկանիշներով համացանցային կայքի միջոցով տուրիստական ծառայություններ մատուցող կազմակերպության գործունեությունը, 2018 թ. նոյեմբերից տարաբնույթ խոսակցությունների և դասընթացների ընթացքում գովազդել են կազմակերպության ծառայությունների դիմաց վճարում կատարելու դեպքում եկամուտ ստանալու հնարավորությունը:

Արդյունքում՝ հիշյալ անձինք ՀՀ բազմաթիվ քաղաքացիների համոզել են ներգրավել կազմակերպության «բիզնես-ծրագրին» և փաստացի նախնական համաձայնությամբ ստեղծել ու ղեկավարել են ֆինանսական բուրգի մասնաճյուղ՝ դրա մեջ ներգրավելով առանձնապես խոշոր չափերի գումար, ընդ որում անդամակցած անձանց նյութական օգուտը պայմանավորվել է բացառապես նոր ներդրողների ներգրավումից ստացված գումարների հաշվին։

Մանրամասները սկզբնաղբյուր կայքում: