Երեկ «Քաղաքացիական պայմանագիր» կուսակցության դրամահավաքի ժամանակ ընտրվել էր «Այո» քարոզչական կողմի տարբերանշանը, սակայն վաղ առավոտից հայկական համացանցում ամենաքննարկված լուրերից մեկն այն էր, որ տարբերանշանը գողացված է: Այն եղել է 1991 թվականի անկախության հանրաքվեի «Այո»-ի տարբերանշանը:

Այն մրցույթին ներկայացրած «Garun Agency» կազմակերպությունը՝ որպես առաջին մրցանակակիր, պիտի ստանար 3 մլն դրամ: Հեղինակային իրավունքի խախտման մասին տեղեկություն ստանալուց հետո «Քաղաքացիական պայմանագիր» կուսակցության հասարակայնության հետ կապերի համակարգող Վահագն Ալեքսանյանը ֆեյսբուքյան իր էջում հայտնեց, որ քննարկվում է «Այո»-ի բրենդինգի մրցույթը հաղթած տարբերակի շուրջ ստեղծված իրավիճակը:

«Ընկերներ, հարկ եմ համարում հայտնել, որ քննարկում ենք «Այո»-ի բրենդինգի մրցույթը հաղթած տարբերակի շուրջ ստեղծված իրավիճակը։ Որոշում ունենալուն պես կհայտարարենք»,- գրել էր Ալեքսանյանը։

ՀՀ փոխվարչապետ Տիգրան Ավինյանը ֆեյսբուքյան իր էջում հրապարակեց 1991 թվականի անկախության հանրաքվեի «Այո»-ի տարբերանշանը՝ գրառմամբ. «Փնտրվում է բնօրինակի հեղինակը»։

«Հայկական ժամանակ»-ը փորձեց կապ հաստատել «Garun Agency»-ի ներկայացուցիչների հետ: «Սփյուռ» տեղեկատվական համակարգում նշված միակ հեռախոսահամարը անհասանելի էր: Ավելի ուշ մեզ հաջողվեց գտնել մեկ այլ հեռախոսահամար, որին պատասխանող անձը հաստատեց, որ կապ ունի «Garun Agency»-ի հետ, բայց միայն այնքանով, որ կազմակերպության հիմնադրի ընկերն է: Նա վստահեցրեց, որ ընկերության հիմնադիրը Ռուսաստանում է, սակայն՝ դեպի Հայաստան ճանապարհին: «Կարծում եմ՝ այսօր կամ վաղը Հայաստանում կլինի, ձեզ կպատասխանի»,- ասաց մեր զանգին պատասխանող տղամարդը:  

Միեւնույն ժամանակ հավելեց, որ  «Garun Agency» կազմակերպությունը նոր է՝ մոտ մեկուկես տարի առաջ է հիմնադրվել, այս ընթացքում ունեցել է բազմաթիվ պատվերներ և որևէ պատվիրատու դժգոհ չի մնացել: 

Թե ինչ կորոշի «Քաղաքացիական պայմանագիր»-ը քննարկման ավարտին, ով կստանա նախանշված 3 միլիոն դրամը, ինչ վերաբերմունք կորդեգրվի «Այո»-ի քարոզչության մեկնարկին այսպիսի տհաճ աղմուկի «հեղինակների» նկատմամբ՝ կտեղեկացնենք, հենց որ տեղեկանանք: