Մոսկվայում տարիներ առաջ դուստրերի կողմից սպանված Միխայիլ Խաչատուրյանի ընտանիքի փաստաբանները կպահանջեն պետական պաշտպանություն, քանի որ զգուշանում են քույրերից: Այս մասին լրագրողների հետ զրույցում հայտարարել է տուժող կողմի փաստաբաններից մեկը` Յուլյա Նիտչենկոն, գրում է «ՌԻԱ Նովոստի» գործակալությունը: 

«Փորձաքննություններով նրանք վտանգավոր են ճանաչվել հասարակության համար: Ես վախենում եմ գտնվել նույն վայրում նրանց ներկայությամբ, կխնդրենք, որ մեզ նույնպես պաշտպանություն տրամադրեն: Նրանց սպառնում է 8-ից 20 տարի ազատազրկում»,-ասել է փաստաբանը:

Այս գործով պետական պաշտպանության տակ է գտնվում դատախազ Մարիա Սեմենենկոն, բայց նա այդ պաշտպանությունը ստացել է ավելի վաղ, այլ գործընթացի ժամանակ, և այդ ժամանակվանից նրան ուղեկցում են ինքնաձիգներով զինված ծառայողները:

Հիշեցնենք, որ Անգելինա, Կրիստինա և Մարիա Խաչատուրյանները ձերբակալվել են 2018թ. հուլիսին՝ հոր՝ Միխայիլ Խաչատուրյանի սպանության մեղադրանքով: Այս գործով հետաքննությունն ավարտվել է նախորդ տարվա դեկտեմբերին: Քննության շրջանակում պարզվել է, որ հայրը տարիներ շարունակ ֆիզիկական, սեռական և հոգեբանական բռնություն է գործադրել դուստրերի նկատմամբ: