Արցախում վերացվել են աշխատանքային ժամերի նկատմամբ որոշակի սահմանափակումներ
Արցախի տեղեկատվական շտաբի ֆեյսբուքյան էջում տեղեկացնում են, որ հիմք ընդունելով Արցախի Հանրապետության պարետի 2020թ. ապրիլի 13-ի որոշման պահանջները, ԱՀ արդարադատության նախարարի 2020թ. օգոստոսի 12-ի հրամանի համաձայն` վերացվել են աշխատանքային ժամերի նկատմամբ սահմանափակումները ՔԿԱԳ և նոտարիատի գործակալության տարածքային ստորաբաժանումներում (քաղաքացիական կացության ակտերի գրանցման բաժիններ և նոտարական գրասենյակներ), ինչպես նաև իրավաբանական անձանց պետական ռեգիստրի գործակալությունում (կենտրոնական մարմին ու սպասարկման և գրանցման բաժին)։ Վերոնշյալ մարմիններն աշխատում են ժամը 9:00-ից մինչև ժամը 18:00-ն:
«Լրացուցիչ տեղեկացնում ենք, որ ԱՀ արդարադատության նախարարի վերոնշյալ հրամանի համաձայն՝ քաղաքացիական կացության ակտերի գրանցման բաժինները չեն իրականացնելու միայն հանդիսավոր պայմաններում ամուսնության պետական գրանցումը, բացառությամբ՝ բացօթյա հանդիսավոր պայմաններում ամուսնության պետական գրանցման»,- նշված է հայտարարության մեջ:
