Ժամանակավոր կառավարություն պետք է ստեղծվի բոլոր քաղաքական ուժերից ու ունակ անհատներից . ԲՀԿ նախագահի ուղերձը

Այսօր այստեղ պետք է ելույթ ունենար ԲՀԿ նախագահ Գագիկ Ծառուկյանը, բայց ինչպես գիտեք, իշխանությունների եւ անձամբ Նիկոլ Փաշինյանի հրահանգով կանչվել է ԱԱԾ, որպեսզի հնարավորություն չունենա ձեզ հետ խոսելու: Այս մասին, այսօր՝ դեկտեմբերի 5-ին, Ազատության հրապարակում «Հայրենիքի փրկության շարժման» հանրահավաքի ժամանակ նշեց ԲՀԿ խմբակցության պատգամավոր Իվետա Տոնոյանը՝ հավելելով, որ Ծառուկյանը ԱԱԾ-ից ուղերձ է հղել: 

Նշենք, որ այսօր հանրահավաքի ժամին Ծառուկյանը հերթական անգամ հրավիրվել է ԱԱԾ հարցաքննության։ 

Տոնոյանը ներկայացրեց ուղերձը՝ նշելով. «Իմ սիրելի հայ ժողովուրդ, Արցախից եկած քույրեր ու եղբայրներ, Ազատության հրապարակում ես պետք է լինեի ձեր կողքին, պետք է խոսեի ձեզ հետ, մեր երկրին պատուհասած իրավիճակի եւ դրանից ելքեր փնտրելու տարբերակների մասին: Բայց ինչպես գիտեք, հերթական անգամ վախկոտ իշխանությունների ձեռքով ես այս պահին գտնվում եմ ԱԱԾ-ում: Ինձ նորից կանչել են հարցաքննության: Իշխանությունները հերթական անգամ ապացուցեին, որ սարսափում են ինձանից, ամեն ինչ անում են, որ ես չկարողանամ հանդիպել իմ ժողովրդի հետ: Ես կրկնում եմ, որ Նիկոլ Փաշինյանը պետք է վախենա ոչ թե ինձնից, այլ իր վարած խայտառակ քաղաքականության հետեւանքներից, իր ժողովրդի բարկությունից, անտուն ու անհայրենիք մնացած մեր շուրջ 100 հազար արցախցիների զայրույթից, զավակ կորցրած ծնողի ցասումից: 

Մեր ժողովրդի ու հայրենիքի առաջ ծառացած խնդիրները լուծելու փոխարեն Նիկոլ Փաշինյանը շարունակում է իմ հանդեպ իրականացվող քաղաքական հետապնդումները: Իր աթոռը պահելու համար նա պատրաստ է ամենաստոր քայլերին անգամ: Որքան էլ ինձ համար ցավալի է այդ մասին խոսելը, ես դեռեւս ամիսներ առաջ կանխատեսում էի, որ մեր երկրի իշխանությունների վարած խայտառակ քաղաքականության պատճառով մոտալուտ վտանգ է հասունանում: Ես դեռ 6 ամիս առաջ եմ հայտարարել, որ այս իշխանությունները պետք է հեռանան: Դա իմ անձնական ցանկությունն ու ամբիցիան չէր, դա մոտալուտ վտանգը կանխելուն ուղղված իմ քայլն էր: Այդ ժամանակ իմ առաջին մտահոգությունը հենց Արցախի անվտանգությունն էր: 

Ես դեռեւս հունիսի 5-ին էի հայտարարել, որ բացառիկ տաղանդ է պետք է ունենալ ռազմավարական գորործընկերների հետ հարաբերություններն այս աստիճան վատացնելու համար: Այն ռազմավարական գործընկերոջ՝ ՌԴ-ի, որը եւս մեկ անգամ ապացուցեց, որ դարերով ամրապնդված բարեկամությամբ դժվարին ասյ օրերին օգնության ձեռք մեկնեց ու կանգնեց հայ ժողովրդի կողքին: Հունիսի 16-ին ԱԺ ամբիոնից հայտարարել էի, որ իշխանությունները պետք է բաց հայտարարեն, թե ինչի շուրջ են բանակցում Փաշինյանն ու Ալիեւը: 

Իհարկե, Նիկոլ Փաշինյանի հրաժարականի հիմքում ընկած էր նաեւ տնտեսության ողնաշարի կոտրումը, կոռուպցիայի դեմ պայքարի ձախողումը, արտաքին աշխարհի գործընկերների հետ հարաբերությունների վատթարացումը եւ բազամթիվ այլ գործոններ: Բայց իմ թիվ մեկ անհանգստությունը Արցախն էր ու նրա անվտանգությունը: Արցախի խայտառակ կապիտուլյացիայից հետո Ն իկոլ Փաշինյանի հեռացումն այլընտրանք չունի: Որեւէ երկրում չի եղել, որ պարտված, թշնամու ռաջ ծնկի իջած ղեկավարը շարունակի պաշտոնավարել: 

Պետք է ձեւավորվի նոր իշխանություն, որը հնարավորություն կունենա վարել նոր բանակցություններ: Իհարկե, որքան էլ ցավալի է ասել, այս փուլում Արցախը հետ բերել չենք կարող, բայց գոնե նոր իշխանությունը հնարավորություն կունենա բանակցությունների արդյունքում նվազագույնի հասցնել ստորագրված խայտառակ փաստաթղթի հետեւանքները, հնարավորություն կունենա արժանապատվորեն շարունակելու բանակցային գործընթացը, արտաքին աշխարհի հետ մեր ազգային շահերը պաշտպանող բանակցություններ վարելու: 

Բայց ինչ ենք տեսնում այս օրերին,. Փոխանակ Նիկոլ Փաշինյանն ընդունելու իր եւ թիմի խայտառակ պարտությունը, ներողություն խնդրի ու լուռ հեռանա, նա ամեն օր փորձում է արդարանալ: Փորձում է իր պարտությունը բարդել ուրիշների վրա: Իր համար մեղավոր են բոլորը՝ բանակը, հրամանատարները, ՀՀ ու Արցախի նախկին նախագահները, ռազմավարական գործընկերները, խորհրդարանական ու արտախորհրդարանական  ուժերը, բայց ոչ երբեք ինքը: Դա եւս թուլամորթության մեկ դրսեւորում է: Որովհետեւ սեփական պարտությունն ընդունելու համար մարդ պետք է արժանապատվություն եւ սաթիբ ունենա: 

Նիկոլ Փաշինյանը շարունակում է հանրությանը սուտ պատմվածքներով խաբել, շեղել նրանց ուշադրությունը: Հյ ժողովրդի պատմության մեջ ցեղասպանությունից հետո ես չեմ հիշում նման ծանր ու ողբերգական էջ: Մենք կորցրեցինք Արցախի 73 տոկոսը, կորցրեցինք մեր լավագույն տղաներին: 

Հիշում եք, երբ հուլիսի 16-ին ԱԺ ամբիոնից ես հարց ուղղեցի Նիկոլ Փաշինյանին, թե կոֆե խմելով, խաբելով մարդկանց չի կարելի մոլոեցնել, իշխանության տարբեր ներկայացուցիչներ ասում էին, որ Ացրախի հարցում չի լինելու հակահայ լուծում: Փաշինյանն ասում էր՝ Արցախի հարցի լուծումը պետք է բավարարի 3 կողմերին՝ Հայաստանի, Արցախի եւ Ադրբեջանի ժողովուրդներին: Արդյունքում ժողովրդի թիկունքում ստորագրված խայտառակ կապիտուլյացիոն փաստաթղթից տեսանք, որ հարցի լուծումը բավարարեց միայն ադրբեջանցի ժողովրդին: 

Իմ սիրտը ցավում է, երբ տեսնում եմ, թե ինչպես է արցախցին իր օջախն այրում, որ թուրքին չմնա: Հավատացեք ցավ է տեսնել պետական բոլոր ատյանների դռները թակող որդեկորույս մայրերին, որոնք խնդրում են, որ գոնե իրենց որդիների մարմինները հետ ստանալ ու հողին հանձնել: 

Հավատացեք, ինձ Նիկոլ Փաշինյանի անձը ընդհանրապես չի հետաքրքրում: Մարդ, ով չունեցավ տղամարդկային արժանապատվություն ընդունելու իր սխալը, չունեցավ պետական մտածողություն՝ ներողություն խնդրելու եւ հեռանալու, ինձ համար նման մարդը այլեւս գոյություն չունի: 

Նիկոլ Փաշինյանն արդեն անցյալ է, նա հեռանալու է: Թե ինքը, թե այս պարտության բոլոր մեղավորները օրենքի առաջ իրենց պատիժն ստանալու են: Փաշինյանը այս  ամենի համար շարունակում է մեղադրել բոլորին եւ անգամ ՌԴ նախագահին, ով հազար անգամ շատ ավելի լավ է տիրապետում ղարաբաղյան բանակցային գործընթացին, քան Նիկոլը: 

Ես այսօր ուզում եմ խոսել մեր առաջիկ անելիքների մասին. Երկիրը կործանման եզրին է, Նիկոլ Փաշինյանը Ադրբեջանին է հանձնում ոչ միայն այն, ինչ պարտավորվել է, այլ ամեն օր տեսնում ենք, թե ինչպես է թուրքը մտնում Սոթք ու ասում՝ մի քանի կմ էլ առաջ պետք է գնամ: վտանգված է Սյունիքի ու Ադրբեջանի հետ սահմանակից մեր մյուս մարզերի ու նրանց բնակիչների ճակատագիրը: Միայն համախմբելով բոլոր առողջ ուժերը մենք կկարողանանք կանգնեցնել այս արհավիրքը, որ բերեց Նիկոլը: 

Դուք արդեն գիտեք, որ 16 կուսակցությունների, հանրության մեջ մեծ հարգանք վայելող մտավորականներ կողմից ձեւիավորված «Հայրենիքի փրկության շարժման» վարչապետի թեկնածուն ՀՀ առաջին վարչապետ Վազգեն Մանուկյանն է: Ես վստահ եմ, որ այսօր էլ նա իր քաղաքական փորձառությամբ կարող է եւ մեր բոլորի օգնությամբ հաղթահարել մեր երկրի առջեւ ծառացած խնդիրները:  Նրա գլխավորությամբ ձեւավորել անցումային ժամանակավոր կառավարություն եւ Հայաստանի գլխավոր բարեկամ, ռազմավարական գործընկեր, տարածաշրջանում անվտանգության միակ երաշխավոր ՌԴ-ի հետ հարաբերություններ կառուցելով կազմել ճանապարհային քարտեզ ու փրկել այն, ինչը դեռ հնարավոր է: 

Այս իշխանության հետ այլեւս որեւէ երկիր չի բանակցելու, որովհետեւ վարչապետի աթոռը զբաղեցնող մարդը ստել է բոլորին, ոչ ոք մեր երկրին  գումար չի տալու, որովհետեւ այս իշխանությանը որեւէ մեկը լուրջ չի ընդունում: 

Մենք պետք է ստեղծենք ազգային փրկության կառավարություն, որտեղ պետք է ներգրավված լինեն բացառապես պրոֆեսիոնալները: Ազգային փրկության կառավարության ծրագիրը պետք է լինի փրկել այն, ինչը դեռ հնարավոր է փրկել Արցախից ու Հայաստանից, թույլ չտալ տարածքային կորուստ: Րոպե առաջ զբաղվել ռազմագերիների, անհետ կորածների եւ դիակների փոխանակման հարցերով, օր առաջ լուծել արցախցիների կենսական խնդիրները: Այդ առաջնահերթ խնդիրները լուծելուց հետո մենք պետք է գնանք արտահերթ խորհրդարանական ընտրությունների, որպեսզի ձեւավորվի այնպիսի իշխանությունը, որը երբեք կազմված չպետք է լինի ոչ մի կենսագրություն, պատասխանատվություն, փորձություն չունեցող պատահական մարդկանցից: Պետք է թիմային մոտեցում, թիմային աշխատանք: Բոլոր քաղաքական ուժերից ու ունակ անհատներից ստեղծվի ժամանակավոր կառավարություն: Անունն այստեղ կապ չունի: Օր առաջ պետք է փոխվի բանակցողը: ես վստահ եմ, որբ հայ ժողովուրդը կարող է շտկել մեջքը եւ շարժվել առաջ»: 

 

Քաղաքականություն

Պատահարներ