ԼՈՒՍԱՆԿԱՐ. Ադրբեջաներեն գրությամբ «Կոկա-Կոլա» ՀՀ չի ներմուծվել. հայտարարություն
«Կոկա-Կոլա Հելլենիկ Բոթլինգ Քամփնի Արմենիա»-ն արձագանքել է սոցիալական ցանցերում տարածված այն լուրերին, թե հայկական շուկայում ադրբեջաներեն մակնշմամբ «Կոկա-Կոլա» է վաճառվում:
«Ցանկանում ենք տեղեկացնել, որ «Կոկա-Կոլա Հելլենիկ Բոթլինգ Քամփնի Արմենիա» ՓԲԸ-ն (ԿԿՀԲՔԱ) Կոկա-Կոլա ընկերության պաշտոնական շշալցնող գործընկերն է Հայաստանում, որն արտադրում կամ ներմուծում և իրացնում է Կոկա-Կոլա Ընկերության ապրանքային նշաններով ոչ ալկոհոլային ըմպելիքներ։
Մեր ընկերության կողմից հայաստանյան շուկայում իրացման նպատակով արտադրվող կամ ներմուծվող ցանկացած ապրանքատեսակի փաթեթավորումը անցնում է վերանայման տարբեր փուլեր և խիստ համապատասխանում է ՀՀ և ԵԱՏՄ կիրառելի կարգավորումներին, փաթեթավորման վրա առկա են տվյալ կարգավորումներով պահանջվող լեզուներով սահմանված տեքստեր՝ հայերեն/ռուսերեն, որևէ փաթեթավորում չի պարունակում ադրբեջաներեն տեքստ, արտադրանքը համապատասխանում է որակի և անվտանգության միջազգային և տեղական պահանջներին։ Տեղեկացնում ենք, որ տվյալ մակնշմամբ ապրանքատեսակը ՀՀ չի ներմուծվել, ինչպես նաև այն ՀՀ-ում իրացման համար արտոնված չէ ոչ ԿԿՀԲՔԱ-ի, ոչ Կոկա-Կոլա Ընկերության կողմից»,- նշվում է հայտարարությունում:
