Միակ ճանապարհն ընտրություններով այս իշխանությանը փոխելն է, մնացած տարբերակները չեն գործելու: Այս մասին այսօր իր ֆեյսբուքյան ուղիղ եթերի ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ խոսելով վերջին շրջանում տեղի ունեցող իրադարձությունների, ճգնաժամից դուրս գալու իրենց առաջարկների մասին:

Նա նշեց, որ քարոզչություն է իրականացվում նրա և նրա թիմի գաղափարախոսության դեմ, որը, նա խոսքով, իրավիճակի համար ելք գտնելն է, սակայն շատ ուժեր կողմ չեն այդ ելքերին:

Մարուքյանը շեշտեց, որ խորը ճգնաժամային վիճակը առաջացել էր նոյեմբերի 10-ից և դեռ այդ ժամանակ ԼՀԿ-ն հրապարակել էր հանգուցալուծման տարբերակը, որը չընդունվեց:

Ընտրությունները կեղծելու հավանական լինելու մասին Մարուքյանը նշեց, որ Հայաստանում միշտ էլ ընտրություններ են կեղծվել, բացի 2018 թվականից, որովհետև դրա համար կարիքը չկար: «Այսքան ուժեղ ընդդիմություն երբեք չի եղել, և դուք ամեն ինչ արեք, որ չկեղծվեն: Այս իշխանությունը ընտրություն կեղծել չի կարողանա, մի իշխանություն, որի աչքի առաջից ինքնաթիռ են գողանում, ինչպես կարող է ընտրություն կեղծել: Նրանց կեղծած ընտրությունը մենք մի երեք անգամ պետք է կեղծենք, որ կեղծվի: Կամ էս իշխանությունը ո՞նց ա կեղծելու, սրանք ոչ մի բան չեն կարում անեն, քթների տակից ինքնաթիռ են տանում, խաբար չեն: Սրանց կեղծած ընտրությունը մի 3 անգամ պիտի կեղծել»,- ասաց նա:

Մարուքյանի դիտարկմամբ՝ ժողովուրդը պետք է որոշի. եթե ուզում է, որ հրաժարական լինի, ապա պետք է Փաշինյանին ճնշենք, որ ընտրության գնա, որ ԳՇ-ից հեռու մնա: «Եթե չենք ուզում այս տարբերակը, լինելու են զոհեր, լինելու է արյունահեղություն, մենք չենք ուզում դա»,-ասաց նա և հավելեց, որ սա պետք է նախկին սխալներին կրկին ականատես չլինելու համար, որպեսզի կրկին զոհեր չլինեն:

Պատգամավորը նշեց, որ իրավիճակը շատ պարզ է՝ Փաշինյանը պետք է զիջումների գնա, չպետք է բանակին քավության նոխազ դարձնի, կամ թողնի, որ այս քաոսը շարունակվի: «Ես չեմ ուզում վերջնաժամկետին հասնենք, ու ասենք՝ վայ, էս ինչ վատ բան եղավ»: