Պատերազմից առաջ անհասկանալի՝ ինչ ուզում ենք, այն էլ բանակցում ենք, կամ ինչ պետք է, այն էլ բանակցում ենք դիվանագիտությունը, որին հաջորդեց պատերազմը: Ընթացքում ոչ ադեկվատ ազդակները և թմրեցնող քաղաքականությունը, ինֆորմացիոն բլոկադան, նոյեմբերի 9-ի հայտարարության անսպասելի կնքումը՝ ժողովրդի մեջքի հետևում, որի իրավունքը չունեինք՝ առանց ժողովրդի ներկայացուցիչների հետ քննարկելու:

Պատերազմի արդյունքների և դրա պատճառների հանդեպ լինելու ենք անողոք: Այս մասին ԱԺ-ում ելույթի ժամանակ ասաց «Լուսավոր Հայաստան» խմբակցության պատգամավոր Աննա Կոստանյանը:

«Դրանից հետո անհասկանալի սահմանազատում՝ GPS-ով, ոչ հայանպաստ պայմաններով, անհասկանալի քարտեզներով, մարդկանց խուճապ, այս գործընթացի անհեռանկար շարունակություն ՀՀ սահմաններին»,-ասաց ԼՀԿ պատգամավորը:

Պատգամավորը պահանջեց, որ չթաքցնեն որևէ գործընթաց կամ պայմանավորվածություն.

«Ժողովրդի անունից խոսողը ոչինչ թաքցնելու իրավունք չունի՝ նույնիսկ ամենավատ հանգամանքը կամ պայմանավորվածություն: Թուրքադրբեջանական ռազմական վերնախավի կողմից հնչեցվող հայտարարություններին՝ անհամաչափ, անատամ պատասխաններ եք տալիս, կամ պարզապես լռում եք: Եթե չեք կարողանում դիվանագիտորեն համարժեք լեզվով խոսել, ապա պետք է մի կողմ քաշվեք և թողնեք խոսեն նրանք, ովքեր կարողանում են: 

Իսկ ո՞վ է ասել, որ պատերազմում կամ դրանից հետո պետք է անողնաշար և ծուռ կեցվածքով հանդես գանք աշխարհին, մանիպուլացիաներով:

 Բավ է մեղավորներ փնտրել նախկինների կամ դրանց նախկինների մեջ, քանի որ պատերազմի մեկնարկի և դրա ողբերգական ավարտի թիվ մեկ պատասխանատուն դուք եք, քանի որ կարող էիք այն կանխել, բայց չեք արել»,-ասաց Աննա Կոստանյանը: