«Հայաստան» դաշինքի անդամ Սայաթ Շիրինյանն այժմ ՀՀ ոստիկանության Գեղարքունիքի մարզային վարչության Մարտունու բաժնում է։ Տեղեկությունը Sputnik Արմենիայի հետ զրույցում հաստատեց Շիրինյանի պաշտպան Բենիկ Գալստյանը։

«Ինձ զանգեցին ոստիկանությունից ու ասացին, որ Սայաթ Շիրինյանը Մարտունիի բաժնում է։ Ես այժմ այնտեղ եմ շարժվում, մինչև իմ աչքերով չտեսնեմ նրան, վստահ չեմ կարող որևէ բան ասել։ Ինձ դեռևս նրա հետ խոսելու հնարավորություն չի ընձեռվել», - ասաց Գալստյանը։

Այսօր ավելի վաղ պաշտպանը Facebook-ում գրել էր, որ դիմակավորված անձինք Շիրինյանին իր տան բակից տարել են անհայտ ուղղությամբ։ Փաստաբանն ավելի քան երկու ժամ չէր կարողանում գտնել իր պաշտպանյալին։

Լրատվականի հետ զրույցում Բենիկ Գալստյանն ասաց, որ բացարձակապես տեղեկություն չունի, թե ինչու են իր պաշտպանյալին բերման ենթարկել, ինչ քրեական հոդված է առաջադրված, ինչու են նրան տարել Մարտունի։

Հիշեցնենք, որ Շիրինյանին մեղադրանք էր առաջադրվել ՀՀ քրեական օրենսգրքի 226.2-րդ հոդվածի 1-ին մասով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը):

ՔԿ–ն 2020-ի դեկտեմբերի 23–ին հաղորդագրություն էր տարածել` նշելով, որ Շիրինյանը Facebook-ում բռնության կոչեր պարունակող գրառում է արել` ուղղված օգտատեր Սուսաննա Ավշարյանին։ «Սուսաննա Ավշարյան, եթե ես լինեի շարժումն առաջնորդողը, ապա վստահ եղեք, մենք կգնայինք կոնկրետ քայլերի, չնայած կազմակերպիչներին չեմ քննադատում, քանզի նրանք խուսափում են արյունահեղությունից: Բայց արդեն պարզից էլ պարզ է, որ առանց արյունահեղության հնարավոր չէ»,– գրել էր Շիրինյանը։

2020 թ–ի դեկտեմբերի 22-ին գրառման առնչությամբ քրեական գործ էր հարուցվել, և Շիրինյանը ձերբակալվել էր։ Անցյալ տարի դեկտեմբերի 25-ին դատարանը նրա ձերբակալումը ոչ իրավաչափ էր ճանաչել։