Ռուսական «Գազպրոմ Նեֆտ» ընկերությունն իր հումքը վերաուղղորդում է զարգացող երկրների, այդ թվում՝ Ասիայի շուկաներ։ Այս մասին «Գիտելիք» միավորման New Horizons մարաթոնի ժամանակ հայտարարել է ընկերության գործադիր տնօրեն Ալեքսանդր Դյուկովը, գրում է ՏԱՍՍ-ը։
 

Դյուկովը նաև նշել է, որ ամենահեռանկարայինը համարում է ասիական շուկան։
 

«Բոլորս գիտենք, որ նավթի և նավթամթերքի պահանջարկի աճը հիմնականում տեղի է ունենում զարգացող երկրներում, և այս առումով ասիական շուկան, ասենք, ամենահեռանկարայինն է։ Այդ թվում՝ մենք վերահղում ենք այն ծավալները, որոնք ավելի վաղ մատակարարում էինք դեպի ավելի ավանդական, եվրոպական շուկա»,- ասաց նա։
 

«Գազպրոմ Նեֆտ»-ի ղեկավարը նշել է, որ ընկերությունն աշխատում է առանց ձախողումների՝ չնայած սահմանափակող միջոցների ճնշմանը, որոնք ավելի վաղ ներդրվել էին եվրոպական երկրների և ԱՄՆ-ի կողմից։
 

Դյուկովը հավելել է, որ ռուսական նավթի հնարավոր էմբարգոն կհանգեցնի էներգակիրների գների բարձրացմանը և շարժիչի վառելիքի մատակարարման ընդհատումների։ Նա նաև կարծում է, որ Ռուսաստանից նավթի մերժումը կհանգեցնի Եվրոպայում էլեկտրաէներգիայի անջատման։
 

Այսօր ավելի վաղ New York Times-ը գրել էր, որ ԱՄՆ իշխանությունները քննարկում են Ռուսաստանին նավթային եկամուտներից զրկելու միջոցների ներդրման հարցը։