Խոշոր հրդեհ՝ Էջմիածնում հայտնի «Դանակ-պատառաքաղի գործարանում»
Այսօր՝ հուլիսի 11-ին, խոշոր հրդեհ է տեղի ունեցել Արմավիրի մարզում։ Ժամը 13։30-ի սահմաններում Արտակարգ իրավիճակների նախարարության փրկարար ծառայության ճգնաժամային կառավարման կենտրոն ահազանգ է ստացվել, որ հրդեհ է բռնկվել Էջմիածին քաղաքի Չարենցի 1 հասցեում գտնվող, սովետական տարիներին հայտնի «Դանակ-պատառաքաղի» չգործող գործարանում։ Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են ԱԻՆ ՓԾ հրշեջ-փրկարարական ջոկատներից 6 մարտական հաշվարկ և 1 սանդուղք։
Ոստիկանները սահմանազատել են տարածքը, որպեսզի հրշեջները կարողանան առանց խոչընդոտի աշխատեն։ Դեպքի վայր են ժամանել նաև «Վաղարշապատ» բժշկական կենտրոնի բժիշկների հերթապահ խումբը, որ, եթե անհրաժեշտություն լինի քաղաքացիներին օգնություն ցուցաբերելու, տեղում կատարեն իրենց աշխատանքը։ Պարզվել է, որ հրդեհը բռնկվել է գործարանի տանիքում և ըստ նախնական տեղեկությունների՝ տուժածներ չկան։ Թե ինչն է եղել հրդեհի պատճառը, պարզվում է։
