Օրվա լրահոս

Փլուզումներն ահռելի ծավալի են, երկաթբետոնե կոնստրուկցիաներ են, գրեթե ողջ տարածքը փլատակների տակ է, 24 ժամյա ռեժիմով շարունակելու ենք իրականացնել որոնողափրկարարական աշխատանքները: Այս մասին 24TV-ի հաղորդման ժամանակ նշել է Արտակարգ իրավիճակների նախարարի առաջին տեղակալ Արտյուշ Գրիգորյանը:

 

Անդրադառնալով անհետ կորած հարազատների այն դժգոհություններին, որ գիշերը տեխնիկայի և փրկարարների պակաս է եղել, ԱԻՆ փոխնախարարը նշել է, որ գիշերը աշխատանքները չեն դադարել, սակայն հերթափոխի և մարդկանց հոգնածության պատճառով աշխատանքների ինտենսիվությունը ցերեկվա համեմատ թուլացել է. «Գործընկեր պետական կառույցներից՝ Երևանի քաղաքապետարանից և տարածքային ինքնակառավարման մարմիններից ներգրավել ենք ջրատար մեքենաներ, ծանր տեխնիկա, ամբարձիչներ, կռունկներ, բեռնատար տրանսպորտային միջոցներ, բայց պնդում եմ, աշխատանքները երբեք չեն դադարել»: 

 

Հարցին, թե որքանո՞վ է հավանականությունը, որ այդքան ժամ անց փլատակների տակից ողջ մնացած քաղաքացիներ կհայտնաբերվեն, Արտյուշ Գրիգորյանը պատասխանել է. «Բացի փլատակների կույտից, նաև շատ բարձր աստիճանի ջերմություն է եղել, ցավոք, հավանականությունը փոքր է, որ նման ծավալի փլատակների տակից կարող ենք ողջ քաղաքացիներ հայտնաբերել: Հրդեհաշիջման աշխատանքների սկզբում 10 քաղաքացու հաջողվել է փրկել, ոչ մեկի կյանքին վտանգ չի սպառնում»:

Վերջին նորություններ