Զինված բախումներ են սկսվել Ղրղզստանի և Տաջիկստանի սահմանի ողջ երկայնքով. կան զոհ և վիրավորներ
Ղրղզստանի և Տաջիկստանի զինվորականների միջև զինված բախումներ են տեղի ունենում երկու երկրների սահմանի ողջ պարագծով: Այս մասին РИА Новости-ին հայտնել են Ղրղզստանի ազգային անվտանգության պետական կոմիտեի սահմանային ծառայության մամուլի կենտրոնից:
Ղրղզական պաշտպանական կառույցները հաղորդել են, որ կրակը բացել է տաջիկական կողմը, ինչին պատասխանել է ղրղզական կողմը: Տաջիկստանի ազգային անվտանգության պետական կոմիտեն իր հերթին հայտնել է, որ ղրղզ սահմանապահները, խախտելով պայմանավորվածությունը, գրոհել են «Իսֆարա» սահմանապահ ջոկատի «Դուշանբե» սահմանապահ դիրքը։
Հաղորդվում է, որ Տաջիկստանի մեկ սահմանապահ է զոհվել, երեքը վիրավորվել են:
Նշենք, որ և՛ Ղրղզստանը, և՛ Տաջիկստանը ՀԱՊԿ անդամ երկրներ են: