Ազատագրումը սկսվում է Եռաբլուրից․ զոհվածների ծնողները կոչ են անում գալ ու կանգնել իրենց կողքին
Մենք՝ Եռաբլուրի հերոսածին ծնողներս, հավատարիմ մնալով աննահանջ պայքարի և մեր տղաների ազգանվեր գործի շարունակության խոստմանը, սեպտեմբերի 26-ին՝ ժամը 23։00-ից սկսած, հավաքվում ենք Եռաբլուրում, որպեսզի սեպտեմբերի 27-ի վաղ առավոտյան կանխենք Նիկոլ Փաշինյանի մուտքը պանթեոն։ Այս մասին իր ֆեյսբուքյան էջում գրել է արցախյան 44-օրյա պատերազմում զոհված Հայկազ Մկրտչյանի մայրը` Աննա Մկրտչյանը` տարածելով զոհվածների ծնողների հայտարարությունը:
«Ազատագրումը սկսվում է Եռաբլուրից. պայքարի կոչ
Հարգելի հայրենակիցներ,
Ապազգային, դավաճանական քաղաքականության արդյունքում հայրենիքը շարունակում է ծանրագույն հարվածներ ստանալ, որոնց հետևանքներն անմիջապես երևում են Եռաբլուրում։ Ծնողներիս համար այլևս անտանելի է տեսնել, թե ինչպես է մեծանում Եռաբլուրը։
Այս պատճառով, լարելով բոլոր ուժերը, նոր թափ ենք հաղորդել մեր պայքարին։ Այո՛, պետք է վերջ դնենք սրբավայրը որպես թատերաբեմ օգտագործելու սովորույթին:
Սեպտեմբերի 21-ին ոստիկանների կողմից իրականացված վայրագություններն առաջացրել են մեր բոլոր արժանապատիվ հայրենակիցների ցասումը։ Շնորհակալ ենք գոտեպնդման և աջակցման խոսքերի համար։ Եվ հիմա, կոչ ենք անում գալ ու կանգնել մեր կողքին, որպեսզի միասնական պայքարի արդյունքում հաջողենք։
Եռաբլուրը հայի պայքարող ու չհանձնվող տեսակինն է։
Աստված պահապան մեր հայրենիքին»,-ասվում է հայտարարությունում: