Ռուսաստանի նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը այսօր հեռախոսազրույց են ունեցել։ Զրույցի ընթացքում պետությունների ղեկավարները քննարկել են Ուկրաինայում տիրող իրավիճակը։ Այս մասին հայտնում է Թուրքիայի նախագահի գրասենյակը, գրում է Kommersant.ru-ն:
 

Էրդողանն ասել է, որ Ռուսաստանը և Թուրքիան շարունակում են աշխատել ռուսական պարարտանյութերի և հացահատիկային ապրանքների անխափան արտահանման ուղղությամբ։ Նա նաև շահագրգռվածություն է հայտնել երկարաձգել Ուկրաինայից հացահատիկի արտահանման պայմանագիրը։
 

Հեռախոսազրույցի ընթացքում, ըստ հեռուստաալիքի, Թուրքիայի նախագահն ասել է, որ գոհ է Ռուսաստանի և Ուկրաինայի միջև գերիների փոխանակման ավարտից։ Էրդողանը կոչ է արել Վլադիմիր Պուտինին շարունակել բանակցությունները ուկրաինական կողմի հետ և հայտարարել է այդ հարցում աջակցելու պատրաստակամության մասին։

Կրեմլի մամուլի ծառայությունը հայտնել է, որ Վլադիմիր Պուտինը երախտագիտություն է հայտնել իր թուրք գործընկերոջը՝ Ստամբուլի համաձայնագրի շուրջ համաձայնությունների ձեռքբերման հարցում Թուրքիայի ներդրման համար։ Ռուսաստանի ղեկավարը ևս մեկ անգամ ուշադրություն է հրավիրել այն փաստի վրա, որ հացահատիկի գործարքի շրջանակներում Ռուսաստանից սննդամթերքի և պարարտանյութի մատակարարման սահմանափակումները պետք է հանվեն։