Պուտինը հայտնել է, թե որն է Ռուսաստանի հետ խաղաղության ճանապարհը
Կրեմլում այս պահին ընթանում է Դոնեցկի և Լուգանսկի Ժողովրդական Հանրապետությունները, ինչպես նաև Խերսոնի և Զապորոժիեի մարզերը ՌԴ կազմում ներառելու մասին պայմանագրերի ստորագրման արարողությունը, որի շրջանակում ՌԴ նախագահ Վլադիմիր Պուտինը հանդես է գալիս ծավալուն ելույթով։
Ինչպես հաղորդում է «Ռիա Նովոստի»-ն, ՌԴ նախագահն իր ելույթում, դիմելով Կիևին ու Արևմուտքին, ասել է՝ Դոնեցկի և Լուգանսկի Ժողովրդական Հանրապետությունների, Խերսոնի և Զապորոժիեի մարզերի բնակիչները հավերժ մեր քաղաքացիներն են դառնում։
«Կիևի ռեժիմին կոչ ենք անում անհապաղ դադարեցնել ռազմական գործողություններն ու վերադառնալ բանակցային սեղան»,- նշել է Վլադիմիր Պուտինը՝ ընդգծելով՝ Ռուսաստանը պատրաստ է բանակցել Ուկրաինայի հետ։
«Կիևը պետք է հարգանքով վերաբերվի Դոնեցկի և Լուգանսկի Ժողովրդական Հանրապետությունների, Խերսոնի և Զապորոժիեի մարզերի քաղաքացիների ընտրությանը։ Միայն այդպիսին կարող է լինել խաղաղության ճանապարհը»,- ասել է ՌԴ նախագահը։
Վլադիմիր Պուտինը հայտարարել է, որ Ռուսաստանն ապահովելու է նշված տարածքների անվտանգությունը և ամեն ինչ անելու է՝ այնտեղ ենթակառուցվածքները վերականգնելու համար։
