Ադրբեջանցիների տարածած լուսանկարներում ենք տեսել նրան ու ճանաչել․ Ռոբերտի քույրը պատմում է

Սեպտեմբերի 12-ի լույս 13-ի գիշերը Ադրբեջանի սանձազերծած հարձակման հետեւանքով զոհվել է պարտադիր ժամկետային զինծառայող Ռոբերտ Արմենի Հայրապետյանը։

 

19–ամյա Ռոբերտը Կոտայքի մարզի Բյուրեղավան քաղաքից էր։ Նա բանակ էր զորակոչվել 2021 թվականի փետրվարին, ծառայում էր Գորիսում։

NEWS.am-ի հետ զրույցում նրա քույրը՝ Դիանան պատմել է, որ Ռոբերտը զոհվել է Իշխանասարի ուղղությամբ մարտերի ժամանակ։ Սեպտեմբերի 20–ին ադրբեջանական կողմից Հայաստանին փոխանցված 95 զինծառայողների աճյուներից մեկն էլ 19–ամյա Ռոբերտինն էր։

 

«Ռոբերտի հետ վերջին անգամ խոսել էինք կեսգիշերին մոտ, երբ դեռ ռազմական գործողությունները չէին սկսվել։ Ընկերների պատմելով՝ Ռոբերտի ձայնը ռացիայով լսվել է մինչեւ լուսադեմ ժամը 5–ը։ Տեղյակ չենք, թե ինչ հանգամանքներում է զոհվել Ռոբերտը։ Նրանից լուր չունեինք, սոցիալական ցանցերում ադրբեջանցիների տարածած լուսանկարներում ենք տեսել նրան ու ճանաչել»,– պատմել է Դիանան։

 

Ռոբերտը սովորում էր Հայաստանի ֆիզիկական կուլտուրայի եւ սպորտի պետական ինստիտուտում։ Նա պրոֆեսիոնալ ֆուտբոլով էր զբաղվում։ Խաղացել է «Գանձասար», «Լոկոմոտիվ» ֆուտբոլային ակումբներում։ Ռոբերտը ընտանիքի կրտսեր զավակն է, իրենից մեծ քույր ունի։

Ռոբերտին հուղարկավորել են սեպտեմբերի 23–ին, զինվորական կարգով, ընտանեկան գերեզմանատանը։

 

Պաշտպանության նախարարության հաղորդմամբ՝ սեպտեմբերի 14–ին, ժամը 20։00–ից բոլոր ուղղություններով կրակը գրեթե դադարել է, էական միջադեպեր չեն արձանագրվել։

 

 

Քաղաքականություն

Պատահարներ