Նյու Յորք նահանգում արտակարգ դրություն է հայտարարվել
ԱՄՆ նախագահ Ջո Բայդենը երկուշաբթի օրը արտակարգ դրություն է հայտարարել Նյու Յորք նահանգում՝ ձնաբքի պատճառով։ Այս մասին ասվում է Սպիտակ տան կայքում տեղադրված հաղորդագրության մեջ։
«Նախագահ Բայդենն այսօր արտակարգ դրություն հայտարարեց Նյու Յորք նահանգում և հրամայեց դաշնային օգնություն տրամադրել՝ 2022 թվականի դեկտեմբերի 23-ին սկսված ձմեռային սաստիկ փոթորիկից հետո արտակարգ իրավիճակին արձագանքելու նահանգային և տեղական ջանքերը լրացնելու համար»,- ասվում է հայտարարության մեջ։
Բայդենը լիազորել է երկրի ներքին անվտանգության վարչությանը և ԱՄՆ Արտակարգ իրավիճակների կառավարման դաշնային գործակալության մասնագետներին՝ ջանքեր գործադրել բնակիչներին օգնելու համար։
Անցյալ շաբաթ ԱՄՆ-ի մի զգալի հատված տուժել է վատ եղանակի պատճառով՝ ցրտի, քամու ուժեղ պոռթկումների և ձյան տեղումների տեսքով։ Ջերմաստիճանը շատ նահանգներում իջել է գրեթե ռեկորդային ցածր մակարդակի:
