Քաղաքացիական ակտիվիստները, որոնք երեկ երեկոյան ճամբար են հիմնել Ստեփանակերտի օդանավակայանի մոտ,  նույն պահանջով շարունակում են մնալ կենտրոնակայանի մոտ, քանի որ Վոլկովը դեռ «գտնված չէ»։

Հիշեցնենք` այնտեղ է գտնվում ռուս խաղաղապահների շտաբը:  

Քաղաքացիները նշում են, որ խաղաղապահները մեր անվտանգության երաշխավոր են եղել։ 

«Մենք զիջել ենք շատ ճանապարհներ, բացառապես այն հույսով, որ մեր անվտանգությունը պետք է պահպանվի, բայց այս պահին դա չի կատարվում։ Խաղաղապահները պետք է համապատասխան գործողություն իրականացնեն։ Մենք ուզում ենք մեր հարցերին լուծում տան»,- ասում են նրանք: 

Նրանք կարծում են, որ Վոլկովը «երես» չունի իրենց դեմ դուրս գալու համար։

Հիշեցնենք, որ  Արցախի մայրաքաղաք Ստեփանակերտից Իվանյանի օդանավակայան ոտքով քայլերթ իրականացրած քաղաքացիները  գիշերել են այնտեղ: 

Արցախի քաղաքացիները պահանջում են բացել կյանքի ճանապարհը՝  Լաչինի միջանցքը, որն արդեն շուրջ քսան օր է, ինչ փակված է Բաքվից այնտեղ քշված կեղծ «բնապահպանների» կողմից։