Թուրքիան մեղադրել է ԱՄՆ-ին և Ռուսաստանին` պայմանավորվածությունները չկատարելու մեջ
Ռուսաստանը և ԱՄՆ-ը չեն կատարել քրդական ուժերին Սիրիայի հյուսիսից դուրս բերելու իրենց պարտավորությունները։ Այս մասին հունվարի 13-ին հայտարարել է Թուրքիայի արտաքին գործերի նախարար Մևլութ Չավուշօղլուն՝ Անկարայում Իտալիայի արտգործնախարար Անտոնիո Տայանիի հետ համատեղ մամուլի ասուլիսում։
Թուրք դիվանագետի հայտարարությունները մեջբերում է ՏԱՍՍ-ը։
«ԱՄՆ իմ այցի ժամանակ մենք կխոսենք Սիրիայի մասին։ Որովհետև նրանք (ԱՄՆ-ն) շարունակում են աջակցել Քրդստանի աշխատավորական կուսակցությանը և Ժողովրդական ինքնապաշտպանության ուժերին։ Մեզ համար սա սպառնալիք է։ Մեզ տրված խոսքը չիրականացվեց ո՛չ ԱՄՆ-ի, ո՛չ Ռուսաստանի կողմից»,- ասել է Չավուշօղլուն։
Դիվանագետի խոսքով՝ Անկարան «անընդհատ» հիշեցնում է Մոսկվային ու Վաշինգտոնին, որ 2019 թվականի համաձայնագրերի պայմանները չեն կատարվել։
