Դասալքության մեղադրանքով Երևանում ձերբակալված ռուսաստանցին ազատ է արձակվել
Դասալքության մեղադրանքով Երևանում ձերբակալված ռուսաստանցին ազատ է արձակվել։
«Հետախուզվող անձը ձերբակալումից մի քանի ժամ անց ազատվել է արգելանքից: Ինչ վերաբերվում է նրան ՌԴ հանձնելու հարցին, ապա այն կարող է քննարկվել հանձնելու մասին միջնորդություն ստանալու դեպքում՝ կիրառելի միջազգային պայմանագրերով հանձնելու համար բավարար հիմքերի առկայության պայմաններում»,-տեղեկությունը Auroranews-ի հետ զրույցում հայտնեցին ՀՀ գլխավոր դատախազությունից։
Ավելի վաղ Հայաստանի ներքին գործերի նախարարությունը հայտնել էր, որ ապրիլի 7-ին Երևանում ձերբակալվել է դասալքության մեջ մեղադրվող ռուսաստանցի․
«ՆԳՆ քրեական ոստիկանության գլխավոր վարչության և Մարաշի բաժանմունքի ծառայողների ձեռնարկած միջոցառումների շնորհիվ ապրիլի 7-ին Նար-Դոսի փողոցում հայտնաբերվել, ձերբակալվել և Մարաշի բաժանմունք է տեղափոխվել Մոսկվայի իրավապահների կողմից դասալքության մեղադրանքով հետախուզվող 23-ամյա Յուրի Տ․-ն»։
Դասալքության մեջ մեղադրվողի հայտնաբերման մասին ՀՀ ոստիկանությունը հայտնել էր ռուսական կողմին և Հայաստանի դատախազությանը։
