Այսօր՝ ժամը 10։00-ին, նախատեսվում է իրականացնել Երևան-Կապան-Երևան փորձնական թռիչք L410 տեսակի օդանավով, տեղեկացնում է Տարածքային կառավարման և ենթակառուցվածքների նախարարությունը։

Ըստ նախարարության՝ իրականացվելու է օդանավակայանի մոտեցման սխեմաների փորձարկում։

Դեռ 2021-ի նոյեմբերին կառավարությունը հայտարարեց, որ գումար կհատկացնի Տարածքային կառավարման և ենթակառուցվածքների նախարարությանը՝ «Սյունիք» օդանավակայանի կրած վնասների մարման համար:

Հիմնավորման մեջ նշվում էր, որ Քաղաքացիական ավիացիայի կոմիտեն «Նովէյր» ավիաընկերությունից ստացել է համապատասխան հայտ Երևան-Կապան-Երևան կանոնավոր չվերթներ իրականացնելու նպատակով։

Չվերթների մեկնարկը նախատեսվում էր 2022-ի հունվարի 20-ից՝ շաբաթական երկու չվերթ հաճախականությամբ։