Ադրբեջանի ԱԳ նախարարությունը պատասխանել է Փաշինյանի հայտարարությանը
Ադրբեջանի ԱԳ նախարարությունը պատասխանել է ՀՀ վարչապետ Նիկոլ Փաշինյանի հայտարարությանը, ըստ որի՝ Ադրբեջանն է պատասխանատու Լաչինի միջանցքի արգելափակման ու Արցախի շրջափակման հարցում։
Ադրբեջանի ԱԳՆ-ն, մասնավորապես, հայտարարել է. «Ի տարբերություն վարչապետի հայտարարությունների՝ եռակողմ հայտարարության համաձայն Ադրբեջանը Լաչինի ճանապարհի նկատմամբ ունի լիազորություններ և ինքնիշխան իրավունքներ։ Ադրբեջանը, ինչպես միշտ, իր պարտավորությունների շրջանակում երաշխավորում է Լաչին-Խանքենդի (իրական անվանումը Ստեփանակերտ) ճանապարհով շարժվող քաղաքացիների, տրանսպորտային միջոցների և ապրանքների անվտանգությունը և կշարունակի ձեռնարկել համապատասխան միջոցներ այդ ուղղությամբ»։
Հիշեցնենք՝ Ադրբեջանը դեկտեմբերի 12-ից փակ է պահում Լաչինի միջանցքը՝ հրաժարվելով կատարել ՄԱԿ-ի Արդարադատության միջազգային դատարանի որոշումը։ Բացի այդ, ապրիլի 23-ին էլ Բաքուն ապօրինի անցակետ է տեղադրել Լաչինի միջանցքում։