Տիգրան Ավինյանի կինը ներողություն է խնդրել բժիշկ Գևորգ Գրիգորյանից
Երևանի փոխքաղաքապետ Տիգրան Ավինյանի կինը՝ Մարիամ Պահլավունին, ներողություն է խնդրել բժիշկ-ուրոլոգ Գևորգ Գրիգորյանից՝ ոչ կոռեկտ բառամթերքի համար։ Ներողություն խնդրելուն Պահլավունուն պարտադրել է դատարանը՝ արձանագրելով, որ նա վիրավորել է Գրիգորյանին: Այս մասին տեղեկանում ենք datalex. am-ից:
2020թ մարտին ուրոլոգ Գևորգ Գրիգորյանը ֆեյսբուքյան իր էջում գրառում էր կատարել՝ հայտնելով, որ որ եթե Տիգրան Ավինյանը համապատասխան քայլեր չձեռնարկի կնոջ ասածի համար, ապա հարցը կլուծվի իրավական ճանապարհով։
«Հարգելի՛ պարոն Ավինյան, դուք չեք կարողացել զսպել ձեր կնոջ ճառերը, և արդյունքում ձեր կինը հանդես է եկել ոչ հարիր բառամթերքով սոցիալական ցանցում` հասցեագրված օտար տղամարդու, ինչը լայն տարածում է ստացել լրատվական դաշտում: Ակնկալում եմ ձեր կողմից տղամարդուն վայել կեցվածք, պատասխանատվություն` սեփական կնոջ բառամթերքի համար»,-գրել էր բժիշկ Գրիգորյանը, սակայն, արձագանք չստանալով, ապրիլի 4-ին դիմել էր դատարան՝ պահանջելով դատական կարգով պարտավորեցնել Պահլավունուն՝ ներողություն խնդրել, հերքել հրապարակայնորեն արտահայտված պատիվը և արժանապատվությունը վիրավորող արտահայտությունները, ինչպես նաև 1 մլն դրամ բռնագանձել` որպես փոխհատուցում։ Խնդրո առարկա հայտարարությունը, որը, հայցվորի դիտարկմամբ, վիրավորանք էր պարունակում, եղել է.
«Առանց դրա էլ բոլորը շատ լավ գիտեն ում շունն ես» արտահայտությունը։
Վերաքննիչ քաղաքացիական դատարանը պարտավորեցրել է Տիգրան Ավինյանի կնոջը՝ ներողություն խնդրել բժշկից, ինչպես նաև բռնագանձել 100.000 դրամ՝ որպես փոխհատուցում՝ Գրիգորյանին պատճառված վնասի համար։ Դատավոր Կարեն Համբարձումյանի հատուկ կարծիք է ներկայացրել՝ իր անհամաձայնությունը հայտնելով վճռի պատճառաբանական և եզրափակիչ մասերով վիրավորանքի դիմաց որոշված 100․000 դրամի չափով փոխհատուցման հետ և գտնում է, որ փոխհատուցման չափը պետք է սահմանվեր 200․000 դրամի չափով, ինչպես և առաջարկվել էր Որոշման նախագծով։
Վճիռը մտել է օրինական ուժի մեջ, ինչի հիման վրա Մարիամ Պահլավունին ֆեյսբուքյան իր էջում հրապարակավ ներողություն է խնդրել բժիշկ-ուրոլոգ Գևորգ Գրիգորյանից։
«Ես՝ Մարիամ Պահլավունիս, վիրավորել եմ Գևորգ Գրիգորյանին, ուստի ներողություն եմ խնդրում առ այն, որ 12.03.2020թ.-ին Ֆեյսբուք սոցիալական կայքում կատարել եմ նրա պատիվն ու արժանապատվությունը վիրավորող թվով մեկ հրապարակում: Այս ամենի համար ես ներողություն եմ խնդրում պարոն Գրիգորյանից»,- գրել է Մարիամ Պահլավունին:
