Թուրքիան դատապարտել է Իսրայելի հարձակումը Պաղեստինի Ջենին քաղաքի վրա
Թուրքիան դատապարտել է Իսրայելի հարձակումը Պաղեստինի Ջենին քաղաքի վրա՝ հավելելով, որ «խորապես մտահոգված է» տարածաշրջանում լարվածության մասով։ Այս մասին գրում է Al Jazeera-ն՝ վկայակոչելով Թուրքիայի ԱԳՆ-ի հայտարարությանը։
«Մենք կրկնում ենք մեր կոչը Իսրայելի իշխանություններին՝ գործել ողջամտությամբ և վերջ դնել նման գործողություններին», - ասվում է Թուրքիայի ԱԳՆ հայտարարության մեջ։
Լրատվականը հաղորդում է նաև, որ իսրայելական ուժերը արցունքաբեր գազ են կիրառել պետական հիվանդանոցի ուղղությամբ, որտեղ հարյուրավոր երեխաներ և տարեցներ են ապաստան գտել և բուժում ստանում։
Հիշեցնենք, որ Իսրայելի պաշտպանության բանակը երեկվանից՝ հուլիսի 3-ից սկսած, հարձակումներ է իրականացնում Պաղեստինի Ջենին քաղաքում գտնվող ճամբարների վրա։ Հայտնի է՝ մինչև այս պահը Ջենինում զոհվել է տասը պաղեստինցի։ Կա 100 վիրավոր, որոնցից 20-ը ծայրահեղ ծանր վիճակում են: