Հինգ-վեց օր Ստեփանակերտի ոչ մի փուռ չի աշխատել․ արդյո՞ք վաղը հաց կլինի
Ստեփանակերտում հինգ-վեց օր է՝ ոչ մի փուռ չի աշխատում։ Եթե հաջողվի, այս գիշեր որոշ փռեր նորից հաց կթխեն։
Այդ մասին «Փաստինֆո»-ին ասել է Ստեփանակերտի քաղաքապետ Դավիթ Սարգսյանը։
Հարցին, թե ստեղծված իրավիճակում քաղաքային իշխանությունն իր բնակիչներին կարողանո՞ւմ է արդյոք ինչ-որ ձևով աջակցել, Սարգսյանը պատասխանել է․
«Ով ինչով կարողանում՝ օգնում է։ Մեկի տանը մի քիչ ալյուր է լինում, կիսում է, մեկը հաց է լինում թխած իր տանը, հարևանին, բարեկամին տալիս է։ Սոցապ նախարարությունը որոշ դեպքերում քիչ ու միչ տրամադրում է․ էդպես էլի․․․»։
Քաղաքապետը նաև նշել է, որ Ստեփանակերտը արդեն քանի ամիս է մաքրության առումով է խեղճացել։
Եթե մինչև շրջափակումը օրական երկու անգամ քաղաքը մաքրվում էր քաղաքը, հիմա երկու օրը մեկ հազիվ են կարողանում։
Տեղեկացենք, որ վաղվանից Ստեփանակերտի հացի արտադրամասերում կիրականացվի նաև հացի վաճառք՝ համար 1 կտրոնով:
