Լուկաշենկոն արգելել է արտերկրում բելառուսական անձնագրերի տրամադրումը
Լուկաշենկոն արգելել է արտերկրում բելառուսական անձնագրերի տրամադրումը: Այս մասին գրում է Kommersant.ru-ն: Բելառուսի նախագահ Ալեքսանդր Լուկաշենկոն հրամանագիր է ստորագրել, որն արգելում է արտերկրում գտնվող երկրի դիվանագիտական հաստատություններին քաղաքացիներին բելառուսական անձնագրեր տալ, երկարացնել և փոխել։ Հրամանագիրը հրապարակվել է նախագահի կայքում:
Փաստաթղթի համաձայն՝ բելառուսները կկարողանան անձնագիր ստանալ կամ փոխել միայն ներքին գործերի մարմիններում՝ վերջին գրանցման վայրում։ Հրամանագիրն ուժի մեջ կմտնի Բելառուսի ազգային իրավական ինտերնետային պորտալում հրապարակվելուց հետո: Սպասվում է, որ կառավարությանը կպահանջվի ոչ ավելի, քան երեք ամիս՝ հրամանագրի կատարման համար։
Դեկտեմբերի 14-ին Բելառուսի խորհրդարանն ընդունել է օրինագիծ, որով առաջարկվում է բելառուսական քաղաքացիությունից զրկել ծայրահեղական գործունեության և պետության շահերին լուրջ վնաս պատճառելու համար։ Այս տարվա սկզբին օրենքը ստորագրել էր Ալեքսանդր Լուկաշենկոն։