Լրագրող Աշոտ Գևորգյանը և ռուսամետ բլոգեր Միկա Բադալյանը այս պահին ունեն վկայի կարգավիճակ։ Sputnik Արմենիայի հետ զրույցում տեղեկությունը հայտնել է նրանց փաստաբան Լիանա Գրիգորյանը։

«Եթե անհրաժեշտություն առաջանա, ապա նրանք որպես վկա կհրավիրվեն հարցաքննության, եթե ոչ, ապա կսպասենք հետագա զարգացումներին։ Ո՛չ խափանման միջոց, ո՛չ էլ հեռանալու մասին արգելք նրանք նկատմամբ ընտրված չէ»,– նշել է փաստաբանը։

Գրիգորյանը տեղեկացրել է նաև, որ ձերբակալվածի իրավաչափության վերաբերյալ այս պահին բողոք է ներկայացվել Սյունիքի ընդհանուր իրավասության դատարան, Աշոտ Գևորգյանի մասով սեպտեմբերի 12–ին արդեն իսկ նշանակվել է դատական նիստ։

Հիշեցնենք, որ նրանք երեկ ուշ երեկոյան նրանք ազատ են արձակվել:

Նշենք, որ ըստ ՀՀ քննչական կոմիտեի` Սյունիքում ապօրինի կերպով զենք-զինամթերք ձեռք բերելու, պահելու և իրացնելու կասկածանքով ձերբակալված 7 անձանցից 2-ը ձերբակալվել են հրազեն ու ռազմամթերք ապօրինի կերպով իրացնելու պահին։ Նախաքննական մարմնի հաղորդագարության համաձայն` կատարվել է դեպքի վայրի զննություն, ինչպես նաև բնակարանների և ավտոմեքենաների խուզարկություններ, հարցաքննություններ։ Արդյունքում առգրավվել են «AK» տեսակի ինքնաձիգ, մարտական փամփուշտներ, նռնակներ, նռնակի պայթուցիչներ, ատրճանակներ, սվին դանակներ, տարբեր տեսակի ու ռազմական նշանակության գույք, կանեփ տեսակի բույսի թփեր։