Ուկրաինայում թույլ են տվել «Ռուսաստանը» գրել փոքրատառով
Ուկրաինայի լեզվի պետական ստանդարտների ազգային հանձնաժողովը հայտարարել է, որ «Ռուսաստանի Դաշնություն», «Ռուսաստան», «Մոսկվա», «Մոսկովիա», «Մոսկվայի թագավորություն», «Ռուսական կայսրություն», «Ռուսաստանի Դաշնության Պետական դումա» և նմանատիպ անունները փոքրատառերով գրելը ոչ պաշտոնական տեքստերում չի համարվում ուկրաինական լեզվի նորմերից շեղում: Այս մասին հայտնում է «Украинские новости» լրատվական գործակալությունը։
Այս հարցը քննարկելիս հանձնաժողովը դիմել է Ուկրաինայի ԳԱԱ-ին պատկանող ուկրաինական լեզվի ինստիտուտին և Ա.Ա.Պոտեբնյայի անվան լեզվաբանության ինստիտուտին։
Հանձնաժողովը հայտարարություն է տարածել այն բանից հետո, երբ սեպտեմբերի 8-ին Ուկրաինայի փոխվարչապետ Իրինա Վերեշչուկը կոչ է արել պաշտոնապես փոխել Ռուսաստանի և նրա առաջնորդների անունների ուղղագրությունը։ Նախօրեին Ուկրաինայի կրթության և գիտության նախարար Օկսեն Լիսովոյը հրաման է ստորագրել, ըստ որի՝ պաշտոնական փաստաթղթերում մեծատառով պետք է գրվի «Ռուսաստանի Դաշնություն» անվանումը։ Նախարարը դա բացատրել է կանոնակարգման պահանջներով։
2022 թվականի փետրվարին Ուկրաինա ռուսական լայնամասշտաբ ներխուժման սկսվելուց հետո ուկրաինացի շատ քաղաքական գործիչներ, պաշտոնյաներ և լրագրողներ սկսեցին «Ռուսաստան», «Ռուսաստանի Դաշնություն», ինչպես նաև «Պուտին» անվանումները գրել փոքրատառերով:
