Հարավային Հնդկաստանի իշխանությունները փակել են դպրոցները եւ օֆիսները, դադարեցրել թռիչքները եւ տարհանել ափամերձ շրջանների բնակիչներին՝ սպասվող ուժեղ փոթորկի պատճառով, որը հավանաբար ափին կմոտենա առաջիկա 24 ժամում։ Այս մասին հայտնում է Reuters-ը:

Սպասվում է, որ Միչաունգ ցիկլոնը հնդկական հարավային Անդհրա-Փրադեշ նահանգի ափերին կմոտենա երեքշաբթի առավոտյան, տեղեկացրել է երկրի օդերեւութաբանական բյուրոն, քամին կլինի կայուն՝ 90-100 կմ/ժամ արագությամբ եւ կարող է հասնել մինչեւ 110 կմ/ժամի։

Անդհրա-Փրադեշում իշխանությունները տարհանել են մոտ 7 000 մարդու ութ մերձափնյա շրջաններից եւ պատրաստվում են տարհանել ընդհանուր առմամբ 28 000 մարդու՝ կախված ցիկլոնի հետագծից եւ ուժից:

Թամիլ Նադուում իշխանությունները չորս մերձափնյա շրջաններում ոչ աշխատանքային օր են հայտարարել եւ խնդրել բնակիչներին առանց անհրաժեշտության փողոց դուրս չգալ։ ԶԼՄ-ների տեղեկացմամբ՝ Չեննաի օդանավակայանը հորդառատ անձրեւներից հետո երկուշաբթի առավոտյան երկու ժամով դադարեցրել է աշխատանքը, իսկ մի քանի չվերթներ չեղարկվել են կամ փոխել ուղղությունը դեպի այլ քաղաքներ։