Պուտինի աջակցությամբ կարող է տեղի ունենալ Էրդողան-Ասադ հանդիպումը
Թուրքիայի և Սիրիայի նախագահներ Ռեջեփ Թայիփ Էրդողանն ու Բաշար Ասադը կարող են մոտ ժամանակներս հանդիպում անցկացնել Մոսկվայում՝ Ռուսաստանի նախագահ Վլադիմիր Պուտինի աջակցությամբ, վերջնական ամսաթիվը կորոշվի ՌԴ նախագահի Թուրքիա նախատեսվող այցի արդյունքներով, գրում է Aydınlık թերթը:
Ավելի վաղ Էրդողանը հայտարարել էր, որ Ասադը դիտորդական դիրքորոշում է դրսևորում Անկարայի և Դամասկոսի հարաբերությունների կարգավորման գործընթացում, սիրիական կողմից դրական տրամադրվածություն չկա:
Թուրքիայի նախագահի գլխավոր խորհրդական Աքիֆ Չաղաթայ Քըլըչն արձագանքելով այս լուրերին հայտնել է, որ Թուրքիայի և Սիրիայի նախագահներ Ռեջեփ Թայիփ Էրդողանի և Բաշար ալ-Ասադի անձնական հանդիպում տեսանելի ապագայում նախատեսված չէ, սակայն աշխատանքներ են տարվում այն կազմակերպելու ուղղությամբ։
Սիրիական խնդրի կարգավորման հարցով ՌԴ նախագահի հատուկ ներկայացուցիչ Ալեքսանդր Լավրենտևը ավելի վաղ հայտարարել էր, որ Սիրիայի և Թուրքիայի ղեկավարները կարող են հանդիպում անցկացնել ՌԴ նախագահ Վլադիմիր Պուտինի ներկայությամբ՝ ավարտին հասցնելով կարգավորման ճանապարհային քարտեզին վերաբերող աշխատանքը, ինչը կվերականգնի դիվանագիտական հարաբերությունները երկու երկրների միջև։
Սակայն Ասադը բացառեց Էրդողանի հետ անձնական հանդիպման հնարավորությունն այն պայմաններում, երբ թուրքական զորքերը գտնվում են Սիրիայի տարածքում։ Նրա կարծիքով՝ ներկայիս իրավիճակում Թուրքիայի նախագահի հետ բանակցությունները կնշանակեն Անկարայի կողմից Սիրիայի հյուսիսի օկուպացիայի ճանաչում։
Անկարայի և Դամասկոսի միջև հարաբերությունները վատթարացան 2011 թվականին Սիրիայում հակամարտության բռնկումից հետո, միևնույն ժամանակ սիրիացի փախստականների հոծ խմբերն անցան Թուրքիա։ Երկու երկրների միջև դիվանագիտական կապերը խզվեցին։
Անցած տարվա դեկտեմբերին Ռուսաստանում կայացել են վերջին 11 տարվա ընթացքում Թուրքիայի և Սիրիայի պաշտպանության նախարարների առաջին բանակցությունները: Ասադը հայտարարել է, որ Սիրիայի տարածքից Թուրքական զորքերի դուրսբերումն անհրաժեշտ պայման է Դամասկոսի և Անկարայի միջև հարաբերությունների կարգավորման համար:
