Այսօր երթուղայինում ՔՊ խմբակցության պատգամավոր Հակոբ Ասլանյանի հետ վիճաբանության հետ բռնված քաղաքացին Սամվել Վարդանյանն է, որը նախորդ տարի ապրիլին նորից հայտնվել էր միջադեպի էպիկենտրոնում: Նա փողոցում Նիկոլ Փաշինյանին հանդիպելիս բղավել էր «Նիկոլ, դավաճան» և դրա համար ձերբակալվել էր և հեռացվել էր աշխատանքից:

ArmLur.am-ի հետ զրույցում Սամվել Վարդանյանը մանրամասներ է պատմել այսօր Հակոբ Ասլանյանի հետ ունեցած վիճաբանությունից:

«Ես հանրային պարսավանքի ինստիտուտն եմ աշխատեցրել, իմ արածը վիրավորական արտահայտություններ անել չէի բնութագրի: Նա իշխանական պատգամավոր է, ես քաղաքացի եմ, որն ունի քաղաքացիական դիրքորոշում տալու իրավունք՝ իր երկրում տեղի ունեցող իրադարձություններին և իշխանությունների քայլերի, խոսքերի վերաբերյալ: Ես ընդամենն ասել եմ այն, ինչ մտածել եմ, ի միջի այլոց, նա այնպես հարվածեց ինձ, որ հեռախոսս ու դրամապանակս տարբեր կողմեր շպրտվեցին, ինքը ոտքերով էլ փորձում էր ինչ-որ բան անել իջնելիս: Ես միայն վերբալ արտահայտություններ եմ հնչեցրել, բայց նրան չեմ հարվածել»,-ասաց քաղաքացին:

Ավելի վաղ լրատվամիջոցի հետ զրույցում Հակոբ Ասլանյանը վստահեցրել էլ, որ քաղաքացին ինչ-որ քաղաքական ուժերի դրդմամբ է նման քայլի գնացել:

ArmLur.am-ի հետ զրույցում, քաղաքացին արձագանելով մեղադրանքներին, ասաց.

«Կարող եմ բարձրաձայն միայն ծիծաղել, քանի որ իմ գործունեությունը հանրային է եղել, ես ինչ-որ ուժերի հետ երբեք չեմ ասոցացվել, ենթադրենք ժամանակին ստորագրել եմ «Հայաքվե» նախաձեռնության հայտարարության տակ, կամ ինչ-որ կուսակցություն հանրահավաք է արել, ես որպես քաղաքացի մասնակցել եմ, դա նշանակում է, որ ես կուսակցական եմ»,-ասաց Սամվել Վարդանյանը: