Ռուսաստանում ակտիվների մեծությամբ եվրոպական յոթ խոշորագույն բանկերը՝ Raiffeisen Bank International-ը, Unicredit-ը, ING-ը, Commerzbank-ը, Deutsche Bank-ը, Intesa Sanpaolo-ն և OTP-ն, 2023 թվականին ռուսական բյուջե են վճարել մոտ 800 միլիոն եվրո հարկ, հայտնում է Financial Times թերթը:

Դա չորս անգամ ավելի է, քան մինչ Ուկրաինա ռուսական զորքերի լայնամասշտաբ ներխուժումը՝ նախապատերազմյան 2021 թվականին եվրոպական բանկերը վճարել են 200 միլիոն եվրո հարկ։

Հարկային վճարումների կեսից ավելին բաժին է ընկնում ավստրիական Raiffeisen Bank International-ին, որն ամենամեծ ներկայությունն ունի Ռուսաստանում օտարերկրյա բանկերի շրջանում: 2021-2023 թվականներին RBI-ի ռուսական շահույթն աճել է ավելի քան երեք անգամ՝ հասնելով 1,8 միլիարդ եվրոյի, ինչը կազմել է ավստրիական խմբի ամբողջ շահույթի կեսը (պատերազմից առաջ Ռուսաստանը կազմում էր RBI-ի շահույթի մոտավորապես մեկ երրորդը):

2023 թվականին Ռուսաստանում եվրոպական բանկերի համախառն շահույթը, գրում է պարբերականը՝ վկայակոչելով նրանց հաշվետվությունը, գերազանցել է երեք միլիարդ եվրոն։

Raiffeisen Bank International-ը նախկինում ասել էր, որ նախատեսում է կրճատել ռուսական բիզնեսը, բայց, ինչպես նշում է թերթը, Ռուսաստանում թափուր աշխատատեղերի վերաբերյալ Raiffeisen Bank-ի վերջին հայտարարությունները ցույց են տալիս հաճախորդների բազան բազմիցս ընդլայնելու «հավակնոտ ծրագրեր»:

Deutsche Bank-ը, OTP-ն և Commerzbank-ը զգալիորեն կրճատել են իրենց ներկայությունը Ռուսաստանում, հայտնել են բանկերի ներկայացուցիչները: Intesa-ն բիզնեսի վաճառքի փուլում է: UniCredit-ում հրաժարվել են մեկնաբանել։

Financial Times թերթը ամերիկյան բանկերին չի ներառել իրենց հաշվարկներում, քանի որ նրանք չեն բացահայտել Ռուսաստանում իրենց աշխատանքի արդյունքները: Կիեւի տնտեսագիտական դպրոցի գնահատմամբ, որը հիմնված է ՌԴ ԿԲ տվյալների վրա, Citigroup-ը 2023 թվականին Ռուսաստանում վճարել է 53 միլիոն դոլարի հարկեր եւ դարձել է Ռուսաստանի Դաշնության արեւմտյան բանկերի մեծությամբ չորրորդ հարկատուն։ Իր հերթին JPMorgan-ը, հետազոտական ինստիտուտի տվյալներով, վճարել է 6,8 մլն դոլար։

FT-ն գրում է, որ արեւմտյան բանկերի հարկերը ցույց են տալիս, թե ինչպես են Ռուսաստանում մնացած արտասահմանյան ընկերությունները «օգնում Կրեմլին պահպանել ֆինանսական կայունությունը՝ չնայած արեւմտյան պատժամիջոցներին»: