Սահակյանցը ևս չի վերցնում պատգամավորական մանդատը
«Հայաստան» դաշինքի ցուցակով պատգամավորի թեկնածու առաջադրված Դավիթ Սահակյանցը չի վերցնելու պատգամավորական մանդատը։ Այս մասին նա գրել է իր ֆեյսբուքյան էջում։
«2020 թ. համազգային աղետից հետո ստեղծված օրհասական իրավիճակում ցանկությունս մեծ էր միանալ պետության և պետականության փրկության շարժմանը, սակայն հանդիպելով անարդարության և ականատես լինելով մի իրավիճակի, որտեղ պատերազմում աղետալի պարտությունից և անդառնալի կորուստներից հետո շարունակեցին իշխել ու երկիրը կործանման տանել նույն ուժերը, ես հասկացա, որ այլևս անզոր եմ ինչ-որ բան փոխել՝ անգամ պատգամավորական մանդատ ունենալով:
Լինելով անկուսակցական, 2021 թ. –ին մասնակցել եմ խորհրդարանական ընտրություններին՝ ընդդիմադիր «Հայաստան» դաշինքի ցուցակով, բայց այժմ նպատակահարմար չեմ գտնում ստեղծված իրավիճակում գործունեություն ծավալել խորհրդարանում, ուստի կշարունակեմ ծառայել պետությանն ու հասարակությանը իմ ոլորտում :
Վաղը մանդատից հրաժարվելու դիմումը կներկայացնեմ ԿԸՀ»:
Նա նաև հավելել է, որ ներկայումս ԱԺ-ում անհրաժեշտ է ոչ թե մշակույթի գործչի, այլ էկզորցիստների (ծես, որով մարդուց հեռացնում են չար ուժերին) ներկայությունը:
