ԼՈՒՍԱՆԿԱՐՆԵՐ. Անջելինա Ջոլին եղել է այն տանը, որտեղ զինյալները առանձնացրել են կանանց և տղամարդկանց
Հոլիվուդյան դերասանուհի Անջելինա Ջոլին (ՄԱԿ-ի փախստականների հարցերով գերագույն հանձնակատարի գրասենյակի հատուկ դեսպանորդը 2001-2022թթ) այցելել է Իրաք: Օսկարակիր դերասանուհին մի քանի լուսանկար է հրապարակել Instagram-ի իր էջում՝ նշելով, թե ինչ է արել պատերազմից ավերված այդ երկրում:
«Զգացմունքային օր իմ ընկերոջ՝ Նադյա Մուրադի հետ, որի հետ պատիվ ունեցա մի օր անցկացնել Իրաքի Սինջարում», - գրել է Ջոլին:
Ջոլին նշել է, որ Սինջարում մարդիկ վերականգնվում են հակամարտությունների և ցեղասպանության հետևանքներից և Նոբելյան մրցանակի դափնեկիր Մուրադը շատ բան է անում` եզդի ժողովրդին օգնելու համար:
«Նա ինձ տարավ Կոչո գյուղի այն տունը, որտեղ մեծացել էր», - գրել է Ջոլին: Նա հավելել է, որ Մուրադն իրեն տարել է հին դպրոց, որտեղ «Իսլամական պետություն» ահաբեկչական խմբավորման զինյալները առանձնացրել են կանանց և տղամարդկանց, նախքան նրանց ստրկացումն ու զանգվածային սպանությունը:
Դերասանուհին ավելացրել է, որ «շատերը դեռ անհայտ կորած են, և արդարության համար պայքարը շարունակվում է»: