Ադրբեջանցիների և վրացի ոստիկանների միջև ծեծկրտուք է տեղի ունեցել
Վրաստանի Մառնեուլիի շրջանի Դաշտեփե գյուղում (ադրբեջանցիների կոմպակտ բնակության վայր) միջադեպ է տեղի ունեցել ոստիկանների և քաղաքացիական անձանց միջև։
Դեպքը տեղի է ունեցել ապրիլի 12-ին, այն բանից հետո, երբ անսթափ վիճակում գտնվող վարորդը Մառնեուլի-Սադախլո ճանապարհահատվածում պարեկային ոստիկանության ներկայացուցիչները վարորդին հրահանգել են կանգնեցնել մեքենան, որը չի ենթարկվել իրավապահների հրահանգին և շարունակել է ճանապարհը: Նա կորցրել է մեքենայի կառավարումը և մեքենան կողաշրջվել է։
Այնուհետև վարորդը և նրա հետ ավտոմեքենայում գտնվող երկու անձինք հայհոյել և ֆիզիկական վնասվածքներ են հասցրել իրավապահներին, վնասել են նաև ՆԳՆ հաշվեկշռում գտնվող ավտոմեքենան։ Միջադեպի ժամանակ դեպքի վայրում հավաքվել է տեղի բնակիչների մի մասը: Նրանք թույլ չեն տվել իրավապահներին ձերբակալել միջադեպին առնչվող անձանց, որոնց էլ հաջողվել է ճողոպրել դեպքի վայրից։
Ձեռնարկված օպերատիվ որոնողական և քննչական գործողությունների արդյունքում հանցագործության մեջ մեղադրվող վարորդը և նրա երկու ուղևորները շուտով ձերբակալվել են ոստիկանների կողմից:
