Տեսակցություն՝ փաստաթղթով. Անահիտ Ավանեսյանը հերթական հրամանն է ստորագրել. «Ժողովուրդ»
«Առողջապահության նախարար Անահիտ Ավանեսյանը հերթական աբսուրդ հրամանն է ստորագրել, ըստ որի՝ բժշկական հաստատություններում կարմրուկով պայմանավորված տեսակցությունները արգելվում են։ Մասնավորապես, կարող են տեսակցել հիվանդին, եթե ներկայացնում են կարմրուկի դեմ պատվաստման կամ նախկինում հիվանդացման փաստը հաստատող փաստաթուղթ։ Այս մասին գրում է «Ժողովուրդ» օրաթերթը։
Ըստ օրաթերթի՝ այժմ հիվանդանոցներում բուժաշխատողները հիվանդատես եկած մարդկանցից պետք է փաստաթղթեր պահանջեն՝ տեսակցություն թույլ տալու համար։ Փաստացի ԱՆ-ն նորից դիմել է կորոնավիրուսի ժամանակ իր կիրառության անարդյունավետությունը եւ անիմաստությունը ապացուցած հին ու փորձված մեթոդին. չէ՞ որ այդ ժամանակ էլ տեսակցությունները արգելում էին, բայց դրանից դուրս կորոնան շարունակում էր տարածվել։
Հարց է առաջանում՝ հիվանդի հարազատին տեսակցությունը արգելելով՝ ավելի քի՞չ կտարածվի կարմրուկը։ Հասարակական տրանսպորտում, մասսայական միջոցառումներին ինչո՞ւ կանխարգելիչ եւ հակահամաճարակային միջոցառումներ չկան։
Հիշեցնենք, որ ավելի վաղ առողջապահության նախարարը հրաման էր ստորագրել բուժաշխատողների պատվաստման մասին, ըստ որի՝ անկախ նրանից՝ անձը շփվել է կարմրուկով հիվանդի հետ, թե ոչ, պետք է պատվաստվի մեկ դեղաչափ, եթե դեռ չի պատվաստվել կամ չի հիվանդացել կարմրուկով։ «Ժողովուրդ» օրաթերթը դիմել է ՀՀ առողջապահության նախարարությանը այս հարցերի հետ կապված մեկնաբանություն ստանալու համար, սակայն հրաժարվել են որեւէ մեկնաբանություն տալ»:
