Բրիտանիայում մեկ տարի թաքցրել են, որ հաքերները գողացել են միլիոնավոր ընտրողների տվյալները, գրում է The Guardian-ը։ Հանցագործներին հասանելի են դարձել բոլոր քաղաքացիների անուններն ու հասցեները, ովքեր գրանցվել են քվեարկության համար 2014-ից 2022 թվականներին, ինչպես նաև իմացել են օտարերկրյա ընտրողների տվյալները։ 

Հաղորդվում է, որ հաքերները կոտրել են նաեւ ընտրական հանձնաժողովի փոստը։ Ըստ հրապարակման՝ դա տեղի է ունեցել դեռ անցյալ տարվա հոկտեմբերին, սակայն ընտրական հանձնաժողովը միայն հիմա է ընդունել գողության փաստը։

Այնտեղ տեղեկատվության բացահայտման հետաձգումը բացատրվում էր «հաքերների կողմից տեղեկատվության հասանելիությունը վերացնելու, միջադեպի մասշտաբները գնահատելու» և անվտանգության լրացուցիչ միջոցներ ձեռնարկելու անհրաժեշտությամբ։