Ինչպես արդեն հայտնել էինք Բաքվից հնչեց  հայտարարություն,  որ իրենք պատրաստ են միակողմանի կարգով Երևանին հանձնել մինչև 100 հայ զինծառայողների դիերը՝ նշելով, որ Կարմիր խաչի միջազգային կոմիտեն արդեն տեղեկացված է իրենց մտադրության մասին:

Auroranews-ը կապ հաստատեց ՀՀ-ում ԿԽՄԿ պատվիրակության հաղորդակցման և կանխարգելման  ծրագրի ղեկավար Զառա Ամատունու հետ՝ հասկանալու, թե ինչ տեղեկություններ կան և ՀՀ-ում ԿԽՄԿ-ն նշված հարցի վերաբերյալ ծանուցում ստացել է։ 

Ամատունին հայտնեց, որ Բաքվի իշխանությունները տեղեկացրել են Կարմիր Խաչի միջազգային կոմիտեին՝ միակողմանիորեն հայկական կողմին հայ զինվորների դիերը հանձնելու պատրաստակամության մասին։ 

«Գործընթացի շարունակությունը կախված է կողմերի իշխանությունների պայմանավորվածությունից, որը կարող է միջնորդի միջոցով ձեռք բերվել կամ այլ ձեւաչափով։ Մենք պատրաստակամ ենք հանդես գալ որպես մարդասիրական միջնորդ, բայց դրա համար կողմերի համաձայնությունն է պետք։ Այսինքն՝ իրենք դրա մասին կարող են տեղեկացնել, բայց այդ գործողությունը կատարել ուղղակիորեն՝ առանց միջնորդի։

Մեր կազմակերպությունը՝ Երեւանի եւ Բաքվի պատվիրակություններով հանդերձ պատրաստակամ է ընդգրկվել եւ աջակցել նմանատիպ մարդասիրական գործողության։ Այս եւ այլ մարդասիրական հարցերով մենք Հայաստանի իշխանությունների հետ երկխոսության մեջ ենք»,– ասաց Ամատունին։