Ընդամենը 1.5 տարի առաջ նախաձեռնվեց,այսպես կոչված, մի «բարեփոխում», որն այսօր հետադարձ փոփոխության է ենթարկվում և ո՛չ հիմնական, ո՛չ հարակից զեկուցողները չանդրադարձան այդ հարցին, խոսքը «կալանքի դատարանների» վերացման մասին է: Այս մասին, այսօր՝ դեկտեմբերի 23-ին, ԱԺ-ում հայտարարեց ԱԺ «Հայաստան» խմբակցության քարտուղար Արծվիկ Մինասյանը՝ ելույթ ունենալով Դատական օրենսգրքում փոփոխություններ կատարելու կառավարության նախաձեռնության վերաբերյալ:

Նա հիշեցրեց, որ 2021 թվականի փետրվարի 3-ին, իշխող կուսակցության պատգամավորներն ընդունում էին «կալանքի դատարանների» մասին նախագիծը՝ բարձրաձայն հայտարարելով, թե դատարանների  արդյունավետության բարձրացման, ծանրաբեռնվածությունը թուլացնելու համար են անում:

«Այսօր ուղիղ հակառակ հիմնավորումներով բերում և վերացնում եք այդ դատարանները: Լավ եք անում, որովհետև այդ դատարանները, ինչպես այն ժամանակ բարձրաձայնում էինք, ստեղծվել էին մեկ նպատակով՝ ծառայեցնել սեփական քաղաքական ուժի դեմ պայքարող անձանց նկատմամբ կալանքի կիրառմանը: Փաստը և հիմնավորումները շատ հստակ են: Հիշեցնեմ Ջհանգիրյան օպերացիան, երբ Գագիկ Ջհանգիրյանն իր հայտնի գաղտնալսված հեռախոսազրույցի ընթացքում ինչպես էր հիմնավորում դատական համակարգի նվաճման գործընթացը, որպեսզի կարողանան զսպել քաղաքական ընդդիմությանը»,-հայտարարել է Մինասյանը:

Ընդդիմադիր պատգամավորը հիշեցրեց նաև  բազմաթիվ դատավորների նկատմամբ իրականացված գործողությունները, որոնք «կալանքի դատարանների» շրջանակներում չէին բավարարում իշխանության ցանկությունները. «Քանի որ այդ անձինք չէին կատարում քաղաքական իշխանության ցանկությունները, նրանց նկատմամբ հարուցվում էին քրեական գործեր, լիազորությունները կասեցվում էին: Հիմա այս փաթեթով նաև խոշորագույն մի «բարեփոխում» է բերվում ԱԺ՝ կասեցված դատավորներին ուղարկում են ռեզերվ՝ այգամ չսպասելով, որ այդ դատավորի նկատմամբ ընթացող դատական գործն արդարացման հիմքով կարող է կարճվել՝ դատավորին հանում են դատավորի կարգավիճակից»,-հայտարարել է  Մինասյանը:

Նա ընդգծել է, որ նման քայլերով ոտնահարվում է մարդու հիմնարար իրավունքները՝ անմեղության կանխավարկածը, օրենքի հետադարձ ուժի կիրառման նորմը. «Լավ, արդարադատությունն այս աստիճան բռնաբարելու ցանկությունը, ձգտումը, կամքը, պահանջը ե՞րբ է ավարտվելու: Երբ, որ վերջնականապես դատական համակարգը  դառնա ՔՊ իշխանության կամակատա՞րը»,-հարց է հնչեցրել պատգամավորը:

Նա հայտնել է, որ ՔՊ վարչության որոշումներով են արդեն դատավորներ նշանակվում, քանի որ ԱԺ մեծամասնությունն ոչ մի այլընտրանքային տարբերակ չի դիտարկում:

«Այսօր դահլիճում լսում եմ հակադարձումներ, թե ընդդիմությունն ինչո՞ւ չի գալիս դահլիճ, թեկնածուներ չի առաջադրում: Կարծես առաջին անգամ է, որ երբ ընդդիմությունն թեկնածու է առաջադրում, ամբողջ թիմով հարձակվում եք, վերջում ձեր ՔՊ որոշմամբ ընտրված անձին բերում այստեղ՝ իբր օրինականացնում եք»,-հայտարարեց Արծվիկ Մինասյանը և եզրափակեց խոսքը՝ ասելով. «Այս դատական «բարեփոխումներ» կոչվածը ևս մեկ անգամ հաստատում է, որ Հայաստանի Հանրապետությունում դատական իշխանությունը շարունակում է զավթվել Քաղաքացիական պայմանագիր կուսակցության կողմից»:

Սրան արձագանքեց ԱԺ նախագահ Ալեն Սիմոնյանը՝ ասելով. «Սա էլ ոնց որ 2008-ի մարտի 1-ից հետո ելույթ լիներ, երբ իշխանությունը ակնհայտ գործողություններ էր անում նույն Ջհանգիրյանի նկատմամբ»: Ապա դիմելով ընդդիմադիր պատգմավորներին՝ նշեց. «Էդ դարակների միջից հանո՞ւմ եք այն ելույթները, որ պետք է լինեին 2006-ին, 2007-ին, 2008-ին, «Կոլցո» օպերացիաների ժամանակ, Սերժ Սարգսյանինեւ Ռոբերտ Քոչարյանին դաշնակից դառնալու ժամանակ, հայտնի մարդկանց ոկղմից դատավորներին զանգելու ժամանակ: Մեկ-մեկ էլ կարող եք մեր ընդդիմադիր ժամանակ եղած ելույթները վերցնել, տեղերով փոխել, ելույթ ունենալ»:

Երբ Արծվիկ Մինասյանը բողոքեց, որ նիստը վարողն օգտվում է իր դիրքից, Ալեն Սիմոնյանն արձագանքեց. «Լավ եմ անում՝ օգտվում եմ, կարող եք հանձնաժողով ստեղծել, ձեզ էլ չեմ ընդհատում, պարոն Մինասյան»: