Շվեյցարական UBS և Credit Suisse բանկերը նախազգուշացնում են ռուսաստանցի հաճախորդներին
Շվեյցարական UBS և Credit Suisse բանկերը սկսել են նախազգուշացնել ռուսաստանցի հաճախորդներին հաշիվները փակելու մասին, եթե նրանք հարկեր վճարեն Ռուսաստանի բյուջե: Տեղեկությունը հայտնում է РБК-ն՝ հղում անելով իրավաբաններին ու շվեյցարական բանկային հատվածի աղբյուրին։
«Մեր փաստաբանական գրասենյակ են դիմել մոտ տասը հոգի, ովքեր մինչ այժմ ստացել են ոչ պաշտոնական հեռախոսազանգեր բանկի աշխատակիցներից՝ զգուշացում է եղել, որ եթե նրանք չդադարեն լինել Ռուսաստանում տեղակայված ընկերությունների սեփականատեր և շարունակեն հարկեր վճարել, բանկը ստիպված կլինի փակել նրանց հաշիվը», - ասել է LEOLEX իրավաբանական գրասենյակի կառավարիչ գործընկեր Ռոման Կուդինովը։
Մեկ այլ շվեյցարացի փաստաբան պնդել է, որ իր հաճախորդներն արդեն բախվել են հաշիվների արգելափակման՝ Ռուսաստանի բյուջե հարկերի վճարման պատճառով։
Շվեյցարիան ավելի վաղ միացել է Ռուսաստանի դեմ Ուկրաինա լայնամասշտաբ ներխուժումից հետո Եվրամիության սահմանած պատժամիջոցներին։ Հաղորդվում է, ո Շվեյցարական ֆինանսական հաստատություններին արգելվում է ավանդներ ընդունել ռուս ֆիզիկական և իրավաբանական անձանցից, եթե մեկ ավանդատուի համար ավանդների գումարը գերազանցում է 100 հազար շվեյցարական ֆրանկը:
Նոյեմբերի 25-ի դրությամբ Շվեյցարիայի իշխանությունները սառեցրել են 7,5 մլրդ շվեյցարական ֆրանկ (7,89 մլրդ դոլար) ռուսական ակտիվներ։ Բացի ֆինանսների սառեցումից, Շվեյցարիայի իշխանությունները բռնագրավել են պատժամիջոցների տակ գտնվող ռուսաստանցիների վերագրվող 15 անշարժ գույք:
