Սանկտ Պետերբուրգում իրականացված ահաբեկչության և Վլադլեն Թաթարսկու (անձնագրով՝ Մաքսիմ Ֆոմին) սպանության կազմակերպիչները եղել ենուկրաինական հատուկ ծառայությունները և նրանց գործակալները, այդ թվում՝ արտերկրում գտնվող ռուսաստանցի ընդդիմադիրները։ Տեղեկությունը հայտնում է Ռուսաստանի ԱԴԾ հանրային կապերի կենտրոնը:

«Պարզվել է, որ Մաքսիմ Ֆոմինի սպանությունը Դարյա Տրեպովայի հետ նախապատրաստել է ուկրաինական դիվերսիոն-ահաբեկչական խմբի անդամ, Ուկրաինայի քաղաքացի, 1987թ.-ին ծնված Յուրի Դենիսովը, որը արագ առաքման ծառայության միջոցով Մոսկվայում նրան է փոխանցել ռազմական թղթակցի գիպսե կիսանդրու տակ քողարկված պայթուցիկ սարքը», -ասված է հաղորդագրության մեջ:

ԱԴԾ-ի տվյալներով՝ Դենիսովն ուկրաինական հատուկ ծառայությունների հանձնարարությամբ 2023 թվականի փետրվարին Կիևից Լատվիայի տարածքով հասել է Մոսկվայի շրջան, որտեղ տեղեկություններ է հավաքել ռազմական թղթակից Վլադլեն Թաթարսկու կենսակերպի և այցելության վայրերի մասին։

«Այդ նպատակով նա ավտոմեքենա է ձեռք բերել և բնակարան վարձել նրա բնակության վայրի մոտ։ Ապրիլի 3-ին տեղի ունեցած ահաբեկչությունից հետո Դենիսովը Ռուսաստանից Հայաստանի տարածքով Թուրքիա է մեկնել»,-նշել են ԱԴԾ-ում։

Հիշեցնենք` ապրիլի 2-ին Սանկտ Պետերբուրգի սրճարաններից մեկում պայթյուն էր որոտացել, որի հետևանքով մահացել էր ռուսաստանցի ռազմական թղթակից Վլադլեն Թաթարսկին։ Ահաբեկչության կատարման մեջ կասկածում են ռուսաստանցի Դարյա Տրեպովային, որը Թաթարսկուն արձանիկ էր նվիրել (արձանիկ մեջ ռումբ էր եղել)։ Տրեպովան ձերբակալվել էր Սանկտ Պետերբուրգում իր վարձակալած բնակարանում՝ պայթյունից գրեթե մեկ օր անց։

Ինչպես հաղորդում է ՌԴ ԱԴԾ-ն, Դարյա Տրեպովան Պետերբուրգում ահաբեկչություն է իրականացրել «Կոռուպցիայի դեմ պայքարի հիմնադրամի» (կազմակերպությունը ճանաչվել է օտարերկրյա գործակալ և արգելված է Ռուսաստանում) ղեկավարության՝ քայքայիչ աշխատանքի կոչերից հետո: Մասնավորապես շրջանառվում են հիմնադրամի ղեկավարներ Լեոնիդ Վոլկովի և Իվան Ժդանովի անունները։ Ահաբեկչության և ծայրահեղականության հրապարակային կոչերի համար Ռուսաստանում քրեական գործեր են հարուցվել, որոնց շրջանակում նրանց նկատմամբ հետախուզում է հայտարարվել։